Өмнөд Солонгосын эрх баригч “Ардын хүч” намын (АХН) дотоод сонгуульд өрсөлдөж буй Ан Чоль Су өнөөдөр тус намын гишүүн, Ерөнхийлөгч асан Юн Сог Ёльд хандан ил тод байдлаар намаасаа гарахыг уриалсан анхны нэр дэвшигч боллоо. Энэ нь зургадугаар сарын 3-нд болох намын чухал сонгуулийн өмнөх улс төрийн томоохон мэдэгдэл болж байна.

Ан Чоль Су “Facebook” хуудсаараа дамжуулан, “Юн Сог Ёльийн намаас гарах алхам нь улс төрийн хариуцлага хүлээх, намын шинэчлэлийг эхлүүлэх анхны, хамгийн чухал алхам болно” гэж мэдэгдсэн бөгөөд экс Ерөнхийлөгчийг намынхаа өмнө шийдвэр гаргах цаг нь болсон гэдгийг онцолжээ.

Тэрбээр, “Ерөнхийлөгч асан хүн хариуцлага хүлээж, намаасаа гарснаар улс төрийн шийтгэлийн үеийг ардаа орхиж, шинэ эрин үе рүү шилжих түүхэн боломж бүрдэнэ. Хэрэв Юн Сог Ёльийг хамгаалсаар байвал АХН ирэх сонгуульд ялалт байгуулна гэж найдах хэрэггүй” хэмээн шүүмжилсэн байна.

Юн Сог Ёль нь өнгөрсөн арванхоёрдугаар сард онц байдал зарласны улмаас Ерөнхийлөгчийн албан тушаалаасаа чөлөөлөгдсөн бөгөөд түүнтэй холбоотойгоор нам дотор улс төрийн хариуцлагын асуудал идэвхтэй яригдаж эхэлсэн. Ан Чоль Су энэ мэдэгдлээрээ тус намыг дотроос нь шинэчлэх, ялалтад хөтлөх гол алхам нь Юн Сог Ёлийн намд үлдэх эсэхтэй шууд холбоотой болохыг илэрхийлсэн анхааруулга өгч байгаа юм.

Сүүлийн үеийн санал асуулгуудын дүнгээр, 2022 оны Ерөнхийлөгчийн сонгуульд Юн Сог Ёльтэй өрсөлдөж байсан Ардчилсан намын дарга асан Ли Жэ Мён АХН-ын нэр дэвшигчдээс хоёр оронтой тооны зөрүүгээр илүүрхэж буй үзүүлэлттэй байна.

Эх сурвалж: Yonhap News Agency