Чех Улс сүүлийн 60 жилийн турш анх удаа газрын тосны хэрэглээгээ Оросын нийлүүлэлтээс ангид, өөр эх үүсвэрээр бүрэн хангаж байгаагаа албан ёсоор зарлалаа. Энэ тухай тус улсын Ерөнхий сайд Петр Фиала пүрэв гарагт мэдэгдэж, “Манай улс түүхэндээ анх удаа Оросынхоос бусад эх үүсвэрээс газрын тосоо бүрэн хангаж эхэллээ” хэмээн онцолсон байна.

Одоо Чех улс түлш, шатахуунаа Каспийн тэнгис орчмын орнууд, Ойрх Дорнод, Хойд Африкаас нийлүүлж байгаа бөгөөд газрын тосыг Италийн Триест боомтоос эхэлдэг TAL (Transalpine Pipeline) дамжуулах хоолой болон түүний салаа IKL хоолойгоор дамжуулан татаж байна. TAL нь Италийн нутгаас Германы өмнөд хэсэг рүү хүрдэг бол Германаас салаалсан IKL хоолой Чехийн нутаг дэвсгэрт орж ирдэг бүтэцтэй. Энэ хоолойн жилдээ найман сая тонн газрын тос дамжуулах хүчин чадал нь Чехийн дотоодын хэрэгцээг бүрэн хангаж чадах хэмжээнд хүрчээ.

Энэхүү дэд бүтцийн өргөтгөлд нийт 60 сая еврогийн хөрөнгө оруулалт хийгдсэн бөгөөд хоолойн өргөтгөл дууссан хоёр сарын дараа буюу 2025 оны гуравдугаар сарын эхээр Чех улс Оросын “Дружба” дамжуулах хоолойгоор газрын тос импортлохоо бүрэн зогсоосон байна.

Түүнчлэн тус улс Оросын байгалийн хийг худалдан авахаа ч зогсоож, 2025 оны эцэс гэхэд хоёр атомын цахилгаан станцдаа Оросын уран ашиглахаа зогсоохоор төлөвлөж байгааг Ерөнхий сайд Фиала мэдэгдсэн юм.

Европын Холбооноос Оросын газрын тосны эсрэг хориг тавьсан хэдий ч Чех улс өнгөрсөн хугацаанд “Дружба” хоолойгоор үргэлжлүүлэн импорт хийсээр байсан. Учир нь өөр эх сурвалж, тээвэрлэлтийн боломж дутмаг байсныг талууд хүлээн зөвшөөрч, шилжилтийн зохицуулалт хийж байв. Харин өнөөдрийн байдлаар Чех улс Оросын эрчим хүчний хараат байдлаас бодитоор ангижирсан Европын дараагийн орон болж байна.

Эх сурвалж: DW