2025 оны дөрөвдүгээр сарын 11-нд Оросын Ерөнхийлөгч Владимир Путин АНУ-ын Ерөнхийлөгч Дональд Трампын тусгай төлөөлөгч Стив Уиткоффыг Санкт-Петербургт хүлээн авч, дөрвөн цаг гаруй хугацаанд уулзалт хийжээ. Энэхүү уулзалт нь ерөнхийлөгчийн номын санд болсон тул Оросын хэвлэлүүд “номын сангийн хэлэлцээр” гэж нэрлэсэн байна.
Кремлийн албан мэдэгдэлд “украины зохицуулалтын асуудлаар ярилцсан” гэж маш товч дурдсан ч тодорхой задаргаа, үр дүнг олон нийтэд танилцуулсангүй. Энэ нь сүүлийн үед АНУ болон ОХУ-ын хооронд албан бус шугамаар явагдаж буй харилцаа, хэлэлцээг идэвхжүүлэх оролдлого байж болзошгүйг шинжээчид онцолж байна.
Reuters-ийн анхаарал татсан мэдээлэл
Уулзалтын үеэр гаргасан албан ёсны мэдээлэл хомс байгаа ч Reuters агентлагийн эх сурвалжтай мэдээнд дурдсанаар, Стив Уиткофф өмнө нь Дональд Трампт Украины сөргөлдөөнийг хурдан зохицуулахын тулд Донецк, Луганск, Херсон болон Запорож мужуудыг ОХУ-ын бүрэлдэхүүнд хүлээн зөвшөөрөх хувилбар дэвшүүлж байсан гэдгийг мэдээлжээ. Энэ нь барууны байр сууринаас тэс өөр бөгөөд маргаан дагуулсан байр суурь юм.
Цаашдын төлөв
Уулзалтын дараа Трамп, Путин хоёр утсаар дахин ярилцах магадлал өндөр байгаа тухай мэдээлэл гарсан. Гэвч энэ уулзалтын агуулга, санал солилцсон чиглэл, шийдвэрлэх асуудлуудын талаар хоёр талаас тодорхой тайлбар өгөлгүй байгаа нь улс төрийн ажиглагчдын сонирхлыг улам ихээр татаж байна.
Эх сурвалж: OfficeLife, Reuters
