Цагаан ордноос пүрэв гарагт мэдээлснээр, Хятадаас АНУ руу нийлүүлж буй бараанд ногдуулах гаалийн татварын хувь хэмжээ 145 хувьд хүрч нэмэгджээ. Энэ нь өмнө нь ногдуулаад байсан 20 хувийн татвар дээр нэмэлт 125 хувийн татвар ногдуулж буйг илэрхийлж байна.

Ерөнхийлөгч Дональд Трамп лхагва гарагт өөрийн мэдэгдэлдээ бүх улс орнуудад ногдуулах татварын хэмжээг 10 хувь гэж зарлаж, хэрэгжих хугацааг 90 хоногоор хойшлуулна хэмээсэн ч Хятадын хувьд энэ хөнгөлөлт хамаарахгүй юм.

Хятадын тал үүний хариуд “харилцан зөвшилцөлд хүрэхгүй бол эцсээ хүртэл тэмцэнэ” хэмээн мэдэгдсэн байна.

Энэхүү хурц шийдвэрийн дараа Европын Холбоо АНУ-ын ган, хөнгөн цагаанд ногдуулсан татварын хариу арга хэмжээг түр зогсоох шийдвэр гаргаснаа мөн пүрэв гарагт зарлажээ. Анхнаасаа ЕХ АНУ-ын 21 тэрбум еврогийн бараанд татвар ногдуулах бэлтгэл хийж байсан ч нөхцөл байдал өөрчлөгдсөн тул төлөвлөгөөгөө хойшлуулж байгаа аж.