АНУ болон Ираны хоорондын хурцадмал байдал дахин анхаарал татаж эхэллээ. Ираны Гадаад хэргийн сайд Аббас Арагчи “Х” нийгмийн сүлжээгээр дамжуулан дөрөвдүгээр сарын арван хоёрны бямба гарагт Оман улсад хоёр тал шууд бус хэлэлцээ хийх болсныг мэдэгдэв. Тэрбээр “Энэ бол боломж төдийгүй сорилт юм. Бөмбөг Америкийн талд байна” хэмээн онцолсон байна.
Тус яриа хэлэлцээ нь Ираны цөмийн хөтөлбөртэй холбоотой асуудлыг зохицуулах зорилготой. АНУ-ын Ерөнхийлөгч Дональд Трамп гуравдугаар сарын долооны өдөр Ираны дээд удирдагч аятолла Али Хаменейд захидал илгээж, хэлэлцээ хийх санал тавьсан ч Иран шууд хэлэлцээ хийхээс татгалзсан юм. Тэд зөвхөн гуравдагч улсын зуучлалтайгаар хэлэлцээг үргэлжлүүлэхэд бэлэн байгаагаа илэрхийлжээ.
Гэсэн ч нөхцөл байдал хурцдаж болзошгүй байна. Дональд Трамп гуравдугаар сарын гучинд мэдэгдэхдээ, хэрэв цөмийн хөтөлбөрийн талаар тохиролцоонд хүрч чадахгүй бол хоёр долоо хоногийн дараа Иранд нэмэлт эдийн засгийн хориг, татвар ногдуулна гэж анхааруулсан. Түүнчлэн “хэрэв хэлэлцээг хүлээж авахгүй бол тэдний хэзээ ч харж байгаагүй бөмбөгдөлтийг эхлүүлнэ” хэмээн сүрдүүлжээ.
Хариуд нь Ираны дээд удирдагч Али Хаменей цэргийн хүчээр халдан орох магадлалд итгэхгүй байгаагаа мэдэгдэж, тус улсын дотоод хэрэгт оролцох аливаа оролдлогод хатуу хариу арга хэмжээ авна гэдгийг анхааруулсан байна.
Трампын зүгээс АНУ, Ираны хоорондох яриа хэлэлцээ хэдийн эхэлсэн бөгөөд энэ бямба гарагт “хамгийн өндөр түвшинд” үргэлжлэнэ гэж мэдэгдсэн ч дэлгэрэнгүй мэдээлэл өгөөгүй байна.
Эх сурвалж: TASS.
