Францын Үндэсний эв нэгдлийн намын (RN) удирдагч Марин Ле Пэн Европын Холбооны 2.9 сая еврогийн хөрөнгийг намын зорилгоор ашигласан хэрэгт буруутгагдаж, таван жилийн хугацаанд төрийн албанд нэр дэвших эрхгүй болох шүүхийн шийдвэрийг “улс төрийн шахалт” хэмээн шүүмжлэв.
Ням гарагт Парисын Эйфелийн цамхагаас холгүй орших Вобан талбайд мянга мянган дэмжигчдэдээ хандан үг хэлэхдээ тэрбээр: “Би бууж өгөхгүй. Бид хуулиас дээгүүр байя гэж шаардаагүй, гэхдээ дор баймааргүй байна” хэмээн мэдэгджээ.
Ле Пэн 2004-2016 оны хооронд ЕХ-ны хөрөнгийг намаа санхүүжүүлэхэд ашигласан нь тогтоогдсон бөгөөд уг шийдвэрийг давж заалдаад байна. Шүүхээс түүнийг дөрвөн жилийн хорих ял, үүнээс хоёр жилийг тэнсэн харгалзах ял болгон, 100,000 еврогийн торгуультайгаар шийтгэсэн бөгөөд энэ нь давж заалдах шатны шийдвэр гартал хүчин төгөлдөр биш байна.
Намын ерөнхийлөгч Жордан Барделла үг хэлэхдээ энэхүү шүүхийн шийдвэрийг “ардчилалд шууд халдсан явдал” гэж нэрлэж, Ле Пэнийг 2027 оны ерөнхийлөгчийн сонгуульд өрсөлдүүлэх эрхийг нь хасахын тулд зориудаар хийгдсэн алхам хэмээн мэдэгджээ. Тэрбээр “шүүхүүдийг бүхэлд нь буруутгах гэсэнгүй, гэхдээ энэ бол улс төрийн сэдэлтэй довтолгоо” гэж нэмж хэлэв.
Харин Ерөнхийлөгч Эммануэль Макроны Нам сэргээн байгуулалтын тэргүүн Габриэль Атталь: “Хулгай хийсэн бол төлөх ёстой” хэмээн хариу өгч, барууны удирдагчид болох Италийн Ерөнхий сайд Жоржиа Мелони, Унгарын Ерөнхий сайд Виктор Орбан нарын дэмжлэгийг "урьд хожид байгаагүй хөндлөнгөөс оролцоо" хэмээн шүүмжилжээ.
АНУ-ын Ерөнхийлөгч Дональд Трамп ч мөн уг ял шийтгэлийг “маш чухал хэрэг” хэмээн тодорхойлсон байна.
Шийдвэрийн дараах BFMTV-ийн санал асуулгаар, Францын иргэдийн 57 хувь нь шүүх хэргийг шударга шийдвэрлэсэн гэж үзжээ. Шүүхийн давж заалдах шатны шийдвэр 2026 оны зунаас өмнө гарах төлөвтэй байгаа нь 2027 оны ерөнхийлөгчийн сонгуулиас өмнөх хугацаанд багтах юм.
RN намын төлөөлөгч Лоран Якобеллигийн хэлснээр, Марин Ле Пэн нэр дэвших боломжгүй болсон ч 29 настай Барделлаг "хамгийн байгалийн, шударга сонголт" гэж үзэж байгаа аж. Гэвч Барделла өөрийгөө "B төлөвлөгөө" гэж шууд хэлэхээс зайлсхийсэн ч RN дэмжигчдийн 60 хувь нь түүнийг ерөнхийлөгчийн сонгуульд нэр дэвшихэд дэмжихээ илэрхийлсэн байна.
Францын одоогийн Ерөнхийлөгч Эммануэль Макрон дараагийн сонгуульд нэр дэвших эрхгүй.
Эх сурвалж: BBC News, Reuters, BFMTV
