Их Британийн Засгийн газар 2030 оноос эхлэн бензин, дизель хөдөлгүүртэй автомашин үйлдвэрлэхийг хориглох шийдвэртээ үнэнч хэвээр байгаа ч энэ шилжилтийг аж үйлдвэрийн хувьд хүндрэлийг багасгах зорилгоор шинэ уян хатан зохицуулалт хийж байгаагаа зарлалаа.

Тээврийн сайд Хайди Александр ням гарагт мэдэгдэл хийхдээ, цахилгаан автомашинд шилжих үйл явцад тавьж буй шаардлагыг зөөллөж, автомашин үйлдвэрлэгчдийг торгуулиас зайлсхийх боломжийг олгоно гэв. Үүнтэй зэрэгцэн Засгийн газар 2.3 тэрбум паундын татварын хөнгөлөлтийг санал болгож, EV худалдан авах болон цэнэглэх цэгийн дэд бүтцийг сайжруулахад хөрөнгө оруулна гэж Ерөнхий сайд Киир Стармер “Times” сонинд бичжээ.

Шинэ өөрчлөлтүүдэд дараах зүйлс багтаж байна:

• Автомашин үйлдвэрлэгчдэд тавих EV хувийн шаардлагыг жил жилээр уян хатан хэрэгжүүлэх боломж нээгдэнэ

• Британийн жижиг үйлдвэрлэгчид (ж.нь. Aston Martin, McLaren) 2030 оноос хойш ч бензин хөдөлгүүртэй автомашин үйлдвэрлэх эрхтэй байна

• Зарим hybrid автомашиныг 2035 он хүртэл худалдаанд байлгахыг зөвшөөрнө

• EV стандарт хангахгүй автомашин бүрт ногдуулах торгуулийг £15,000-оос £12,000 болгон бууруулна

Энэхүү шинэ бодлого нь АНУ-ын Ерөнхийлөгч Дональд Трамп Британийн автомашинд 25 хувийн тариф тогтоосонтой давхцаж байгаагаараа онцлог. АНУ бол Их Британийн автомашины хоёр дахь том экспортын зах зээл бөгөөд энэ тариф нь тус салбарт томоохон эрсдэл дагуулж байна. Jaguar Land Rover компани шинэ нөхцөл байдалд дасан зохицохын тулд АНУ-д нийлүүлэлтээ түр зогсоохоо зарласан байна.

Харин сөрөг хүчний зүгээс энэхүү шинэ арга хэмжээг хангалтгүй гэж шүүмжилж байна. Консерватив намын бизнесийн асуудал хариуцсан сүүдрийн сайд Эндрю Гриффит “энэ бол дутуу боловсруулсан арга хэмжээ” хэмээсэн бол Либерал Ардчилсан нам илүү үр дүнтэй хэрэглэгчийн урамшуулал бий болгохыг шаарджээ.

Эх сурвалж: BBC News, The Times, Reuters