АНУ-ын Ерөнхийлөгч Дональд Трампын зарласан шинэ тарифууд Азийн орнуудад ихээхэн түгшүүр төрүүлж байна. Үүний гол шалтгаан нь тодорхой бус байдал юм. Хувьцааны зах зээлүүд тодорхой бус байдлыг таалдаггүй, харин тарифын хувь хэмжээ, хэрэгжих эсэх зэрэг олон зүйл тодорхойгүй хэвээр байна.
Өнгөрсөн долоо хоногт АНУ хамгийн өндөр тариф ногдуулсан арван улс, бүс нутгийн тав нь Азиас байсан нь бүс нутгийн компаниудын хувьд АНУ-д бараа бүтээгдэхүүн экспортлох өртөг нэмэгдэхэд хүргэжээ.
Vanguard хөрөнгө оруулалтын компанийн Ази, Номхон далайн бүсийн ахлах эдийн засагч Чиан Вангийн хэлснээр, "АНУ-ын тарифын өсөлтийн гол дарамтыг Ази үүрч байна". Тэрбээр мөн "Тарифыг бууруулах талаар хэлэлцэх орон зай байж болох ч шинэ, өндөр тарифын систем урт хугацаанд үргэлжлэх төлөвтэй. Энэ нь дэлхий болон Азийн эдийн засагт сөргөөр нөлөөлнө" хэмээжээ.
Нөгөө талаас Хятадын хариу арга хэмжээний талаар санаа зовниж байна. Бээжин АНУ-ын тарифт хариу болгож 34 хувийн татвар тогтоохоо мэдэгдсэн нь "Хятад бууж өгөхгүй гэсэн дохио" гэж Сингапур дахь Mizuho Securities компанийн захирал Вишну Варатхан хэлсэн байна. Тэрбээр цааш нь "Энэ нь АНУ-Хятадын худалдааны зөрчлийг улам хурцатгаж, нөхцөл байдлыг намжаах найдвар бүдгэрч байна" гэж анхааруулжээ.
Эх сурвалж: BBC News
