Израилын Ерөнхий сайд Беньямин Нетаньяху Унгарт айлчилсны дараахан Унгарын Засгийн газар Олон улсын эрүүгийн шүүх (ОУЭШ)-ээс гарч буйгаа мэдэгдлээ. Засгийн газрын төлөөлөгч Гергели Гуляс энэ талаар албан ёсоор зарласан бөгөөд тэдний тайлбарласнаар ОУЭШ-ийн үйл ажиллагаа Унгарын үндэсний эрх ашигт нийцэхгүй болсон гэж үзэж буй юм.

Өнгөрсөн 11 дүгээр сард ОУЭШ-ийн шүүгчид Израил, ХАМАС-ын зэвсэгт мөргөлдөөний үеэр Ерөнхий сайд Б.Нетаньяхуг "хүн төрөлхтний эсрэг болон дайны гэмт хэрэг үйлдсэн" хэмээн буруутгаж, баривчлах тушаал гаргасан. Харин Ерөнхий сайд В.Орбан энэхүү шийдвэрийг үл тоон Израилын удирдагчийг орондоо урьж, “энэ шийдвэр Унгарт хамаарахгүй” гэсэн байр суурийг илэрхийлжээ.

Унгар нь 2002 онд байгуулагдсан, 125 гишүүн оронтой ОУЭШ-ийг анх үүсгэн байгуулалцсан улсуудын нэг юм. Тус шүүх нь геноцид, дайны болон хүн төрөлхтний эсрэг гэмт хэргүүдэд буруутгагдсан этгээдүүдийг шүүн яллах үүрэгтэй бөгөөд Ромын дүрмийн хүрээнд гишүүн орнууд энэ байгууллагын шийдвэрийг дагаж мөрдөх үүрэг хүлээдэг.

Унгарын ийнхүү шүүхээс гарч буй нь тус улсын гадаад бодлогод томоохон өөрчлөлт оруулж буй үйлдэл хэмээн олон улсын ажиглагчид дүгнэж байна.

Эх сурвалж: BBC