Мьянмарын төв хэсэгт өнгөрсөн баасан гарагт болж, 7.7 магнитудын хүчтэй бүртгэгдсэн газар хөдлөлтөөр амиа алдсан хүний тоо 3000-г давжээ. Тодруулбал, тус улсын цэргийн хунтын мэдээлснээр 3003 хүн амь үрэгдэж, 4515 иргэн гэмтэж бэртсэнээс гадна 351 хүн сураггүй хэвээр байна гэж NHK мэдээлэв.

Олон хүний амийг авч одсон байгалийн энэ гамшгийн дараа цэргийн хунтын зүгээс сэргээн босголтын ажлыг эрчимжүүлэхийн тулд зэвсэгт мөргөлдөөнийг түр зогсоох шийдвэр гаргажээ. Тодруулбал, үндэстний цөөнх болон ардчиллыг дэмжигч Үндэсний эв нэгдлийн засгийн газрын эсрэг явуулж буй байлдааны ажиллагааг дөрөвдүгээр сарын 22-ныг хүртэл зогсоохоор болсон байна.

Харин Үндэсний эв нэгдлийн засгийн газар үүнтэй адил хугацаанд гал зогсоох шийдвэрийг бямба гарагт зарлаж, байгалийн гамшгийн нөхцөл байдалд хүний амь насыг аврах, сэргээн босгох ажлыг нэн тэргүүнд тавих ёстойг мэдэгджээ.

Мьянмарын цэргийн удирдагч Мин Аун Хлайн Бангкокт болох бүс нутгийн удирдагчдын уулзалтад оролцохоор пүрэв гарагт зорчих төлөвтэй байгаа бөгөөд олон улсын тусламж дэмжлэг хүсэхээр төлөвлөж байгааг төрийн мэдлийн хэвлэлүүд мэдээлжээ. Тэрбээр 2021 оны төрийн эргэлтийн дараа ихэнх улс орнуудын хориг арга хэмжээнд өртсөн бөгөөд энэ удаагийн уулзалт нь олон улсын тавцанд оролцож буй ховор тохиолдол болох юм.

Олон улсын хамтын нийгэмлэгээс тусламж ирүүлэх эсэх нь тодорхойгүй байгаа ч гамшгийн хор уршгийг арилгах ажилд гадаад дэмжлэг амин чухал болоод байна.

Эх сурвалж: NHK