Францын Парисын шүүх гуравдугаар сарын 31-нд “Үндэсний нэгдэл” намын парламент дахь фракцийн тэргүүн Марин Ле Пенд дөрвөн жилийн хорих ял оноож, таван жилийн хугацаанд сонгуульд нэр дэвших эрхийг нь хязгаарлалаа. Шүүхийн шийдвэрийн дагуу тэрээр хоёр жилийг цахим бугуйвчтай, үлдсэн хоёр жилийг тэнсэн хэлбэрээр эдлэх юм байна. Мөн €100 мянган еврогийн торгууль ногдуулжээ.
Парисын прокурорын зүгээс түүнийг Европын парламентын хөрөнгийг намын үйл ажиллагаанд зарцуулсан, хууль бусаар мөнгө завшсан гэж үзсэн байна. Тухайлбал, 2004–2016 оны хооронд туслахын нэрээр ЕХ-ноос сар бүр €21 мянган еврог авч байсан гэж буруутгаж байгаа бөгөөд нийт хохирлыг €4 сая гэж шүүх үзжээ. Түүнтэй хамт 12 туслах шүүгдсэн бөгөөд намд нь €1 сая еврогийн торгууль ногдуулсан байна.
Мөрдөн байцаалт 2014 оноос эхэлсэн ба Европын луйврын эсрэг товчооноос анхлан шалгаж эхэлжээ. Марин Ле Пен өмнө нь мөн уг хэрэгт холбогдож байсан бөгөөд ЕХ-ноос €339 мянгыг буцаан төлөхийг шаардаж байв.
Олон улсын улс төрчдийн хандлага
Энэ шийдвэр олон улсын анхаарлыг татаж, улс төрчдийн зүгээс янз бүрийн байр суурь илэрхийлсэн байна. АНУ-ын Ерөнхийлөгч Дональд Трамп түүний эсрэг ял оноосон нь өөрт нь тулгасан хэрэгтэй адил байна гэж мэдэгдсэн бол ОХУ-ын ГХЯ-ны төлөөлөгч Мария Захарова үүнийг “либерал ардчиллын үхэл” гэж тодорхойлжээ. Унгарын Ерөнхий сайд Виктор Орбан "Je suis Marine" гэсэн уриа гарган дэмжиж буйгаа илэрхийлсэн нь “Je suis Charlie” уриаг санагдуулж байв.
Францын дотоодод ч эсэргүүцэлтэй тулгарсан бөгөөд барууны “Франц босоцгоо” намын удирдагч, Ерөнхийлөгчийн нэр дэвшигч Эрик Земмур шүүхийн хэт эрх мэдэлд анхаарал хандуулахыг сануулжээ. Италийн Ерөнхий сайдын орлогч Маттео Сальвани “Брюсселийн зүгээс дайн зарлаж буй хэрэг” гэж тодорхойлсон бол Голландын “Эрх чөлөөний нам”-ын тэргүүн Герт Вилдерс Ле Пен давж заалдаад ялж, эцэст нь Ерөнхийлөгч болно гэсэн итгэлээ илэрхийлжээ.
Марин Ле Пены товч намтар
Марин Ле Пен нь 1968 онд Парисын Нёйи-сюр-Сенд хотод төрсөн бөгөөд барууны үзэлтэн Жан-Мари Ле Пены охин. Парисын Пантеон-Ассас их сургуулийг эрх зүйч мэргэжлээр дүүргэсэн тэрээр 1986 онд “Үндэсний фронт” намд элсэж, 2011 оноос намын даргаар ажиллаж байна.
Тэр 2012, 2017, 2022 онуудад Ерөнхийлөгчийн сонгуульд өрсөлдөж байсан бөгөөд 2022 оны сонгуулиар 41.5 хувийн санал авч, Эммануэль Макроны араас хоёрдугаарт бичигдсэн. Өнөөдөр ч түүнийг 2027 оны сонгуулийн гол өрсөлдөгчдийн нэг гэж тооцож байв.
Шүүхийн шийдвэр хүчинтэй хэвээр үргэлжилбэл Марин Ле Пен 2027 оны сонгуульд нэр дэвших боломжгүй болж байгаа юм.
Эх сурвалж: Iz.ru, REUTERS
