АНУ-ын Нью-Жерси мужаас сонгогдсон Ардчилсан намын сенатч Кори Букер Сенатын танхимд хоёр өдөр дамнан нийт 25 цаг 4 минут үг хэлж, тус танхимын түүхэнд хамгийн урт илтгэлийн рекордыг шинэчиллээ. Өмнөх дээд амжилтыг 1957 онд сенатч Стром Турмонд 24 цаг 18 минут илтгэл тавьж тогтоож байсан юм.
К.Букерийн урт илтгэл нь Ерөнхийлөгч Дональд Трампын засаг захиргааны бодлого Америкийн олон нийтэд үзүүлж буй хохиролтой холбоотой байв. Тэрбээр үг хэлэхдээ:
-
АНУ-ын Ерөнхийлөгч 71 хоногийн дотор америкчуудын аюулгүй байдал, санхүүгийн тогтвортой байдал, ардчиллын үндэс суурьт ихээхэн хохирол учрууллаа.
-
Илон Маскийн нэр холбогдсон засгийн газрын шинэ хэмнэл, бүтцийн өөрчлөлтүүдийн үр дагаварт анхаарах шаардлагатай.
-
Эрүүл мэндийн тусламж үйлчилгээний гол хөтөлбөрүүдийг хасах эрсдэлтэй тул Америкийн ард түмэн болгоомжтой байх ёстой.
Сенатч Букер илтгэлийнхээ эхэнд "чадлынхаа хэрээр удаан үг хэлнэ" хэмээсэн бөгөөд илтгэл нь даваа гаргийн оройноос мягмар гаргийн оройг хүртэл үргэлжилсэн байна.
Тэрээр Нью-Жерси мужаас сонгогдсон анхны өнгөт арьст сенатч бөгөөд Сенат дахь өнгөт арьст таван гишүүний нэг юм. 2013 оноос хойш Сенатад ажиллаж буй К.Букер энэхүү илтгэлээр Ардчилсан намын дунд нэмэгдэж буй шахалтыг бодитоор илэрхийлсэн хэмээн ажиглагчид дүгнэж байна.
Эх сурвалж: CNN
