АНУ-ын зуучлалаар Орос, Украины төлөөлөгчид Саудын Арабын нийслэл Эр-Рияд хотын “The Ritz-Carlton” зочид буудалд гуравдагч талын оролцоотой хоёр дахь удаагийн уулзалтаа 2025 оны 3 дугаар сарын 23, 24-нд хийжээ. Уулзалтыг албан ёсны “энхийн хэлэлцээр” гэж нэрлээгүй ч шинжээчдийн түвшний санал солилцоо гэж тодорхойлсон байна.

Хэлэлцүүлгийн гол сэдэв нь Хар тэнгисийн усан тээврийн аюулгүй байдал байлаа. Энэ талаар Оросын Гадаад хэргийн сайд Сергей Лавров “Орос улс Хар тэнгисийн санаачилгыг сэргээхэд бэлэн, гэхдээ бүх талд нийцэх хэлбэрээр” гэж мэдэгджээ. АНУ-ын зүгээс энхийн үйл явцыг шат дараатайгаар (step by step) хэрэгжүүлэх боломжтой гэж үзэн, энэ хүрээнд тэнгисийн бүсэд мөргөлдөөнийг хязгаарлах асуудлыг ярилцсан бололтой.

Украины Батлан хамгаалахын сайд Рустем Умеров энэ уулзалтын талаар “Талууд галыг бүрэн зогсоох боломжийн талаар хэлэлцсэн. Тэнгисийн байгууламж, голын боомтуудад довтлогоо хийхгүй байх ойлголцол яригдсан” хэмээн мэдээлжээ.

Мөн Орос, АНУ-ын Ерөнхийлөгч нарын түвшинд тохирсон эрчим хүчний байгууламжууд руу цохилт өгөхгүй байх тохиролцооны хүрээнд Украины тал аль байгууламжуудад довтолгоо хийхгүй байх шаардлагатайг жагсааж өгсөн байна. Энэ нь дэд бүтцийн хамгаалалтад анхаарч эхэлсэн алхам хэмээн шинжээчид дүгнэж байгаа юм.

Хэдийгээр энэхүү уулзалтанд галыг бүрэн зогсоох, хуурай газрын хил, энхийн гэрээ зэрэг асуудал шууд яригдаагүй ч АНУ, Оросын шинжээчдийн түвшний бүлэг энэ мэт асуудлыг судалж, шат дараатай хэлэлцэж байгааг мэдээлжээ.

Цагаан ордны эх сурвалжийн мэдээлснээр, АНУ сөргөлдөөнийг 1-3 сарын дотор бүрэн зогсоох боломжгүйг хүлээн зөвшөөрсөн бөгөөд 2025 ондоо багтаан шийдвэрлэхийг зорьж буй аж. Энэ нь сөргөлдөөнийг алхам алхмаар намжаах, түр эвлэрэл байгуулах, тодорхой бүс нутагт мөргөлдөөнөөс зайлсхийх байдлаар энхийн процесс явагдаж буйг илтгэж байна.

Эх сурвалж: OfficeLife.