Туркийн сөрөг хүчний удирдагч, Истанбул хотын дарга Экрем Имамоглуг гуравдугаар сарын 19-нд баривчилсны дараа эхэлсэн эсэргүүцлийн жагсаал өнөөдрийг хүртэл үргэлжилж байна. Туркийн Дотоод хэргийн сайд Али Ерликаягийн мэдээлснээр, уг жагсаалд оролцсон 1133 хүнийг баривчилжээ. Тэдний дунд гэрэл зурагчид, сэтгүүлчид багтсан бөгөөд Туркийн Хэвлэл мэдээлэл, хууль судлалын нийгэмлэгээс (MLSA) 10 сэтгүүлч, зурагчин баривчлагдсаныг мэдээлэв.

Олныг хамарсан баривчилгааг Туркийн хэвлэл мэдээллийн ажилтнуудын "Disk-Basin-Is" холбоо шүүмжилж, “хэвлэлийн эрх чөлөө, үнэнийг мэдэх эрхэд халдсан” гэж мэдэгдсэн байна.

Гуравдугаар сарын 24-нд Истанбул болон Анкара хотуудад дахин олон мянган хүн цуглаж, засгийн газрыг огцрохыг шаардан жагссан бол Ерөнхийлөгч Режеп Тайип Эрдоган эдгээр жагсаалыг “хүчирхийллийн хөдөлгөөн” хэмээн тодорхойлж, сөрөг хүчний Бүгд найрамдах ардын намыг буруутгасан байна. Жагсаалын үеэр цагдаагийн 123 ажилтан гэмтсэн тухай ч мэдээлсэн юм.

Э.Имамоглуг авлига болон терроризмын хэрэгт буруутган, шүүхийн шийдвэрийн дагуу гуравдугаар сарын 23-ны өглөө албан ёсоор баривчилж, хорьсон. Түүнийг Курдийн Ажилчны намыг дэмжсэн гэж буруутгаж байгаа бөгөөд энэ намыг Турк улсын хуулиар хориглосон байдаг. Баривчилгаа нь олон нийтийн дургүйцэл, улмаар жагсаал цуглааныг улам өрнүүлэх шалтгаан болжээ.

Туркийн Прокурорын газар 100 орчим хүнийг баривчлах зөвшөөрөл олгосон ба баривчлагдсан хүмүүсийн дунд Истанбул хотын захиргааны албан тушаалтнууд ч байгаа аж.

Ийм нөхцөл байдал дунд сөрөг хүчний Бүгд найрамдах ардын намаас гуравдугаар сарын 23-нд Экрем Имамоглуг 2028 оны ерөнхийлөгчийн сонгуульд нэр дэвшүүлсэн байна.

Эх сурвалж: DW