АНУ. ОХУ-ын төлөөлөгчид Саудын Арабын нийслэл Эр-Рияд хотноо өчигдөр хэлэлцээ хийлээ. Хэлэлцээ 12 цаг гаруйн турш үргэлжилсэн тухай РИА Новости мэдээлжээ.
Төлөөлөгчид хэвлэл мэдээллийнхэнд хандаж мэдээлэл хийгээгүй байна. Талууд хамтарсан мэдэгдлээ гуравдугаар сарын 25-ны мягмар гаригт нийтэлнэ гэж "РИА Новости" агентлагийн эх сурвалж мэдээлсэн байна.
Хоёр улсын "техникийн багуудын" шинжээчдийн уулзалт даваа гаригт Москвагийн цагаар 10:00 цаг орчимд эхэлжээ. Уулзалтыг “Ritz-Carlton” зочид буудалд хаалттай хэлбэрээр зохион байгуулсан байна. Хэлэлцээнд Оросын талыг Холбооны Зөвлөлийн олон улсын хорооны дарга Григорий Карасин, Аюулгүй байдлын албаны захирлын зөвлөх Сергей Беседа нар төлөөлөн оролцжээ.
Кремлийн хэвлэлийн албанаас мэдээлснээр, уулзалтын үеэр хэлэлцсэн гол сэдэв нь Хар тэнгисийн санаачилга байсан бөгөөд уг асуудлыг Владимир Путин, Дональд Трамп нар хамгийн сүүлд утсаар ярихдаа хэлэлцсэн юм.
Хоёр орны удирдагчид гуравдугаар сарын 18-нд утсаар ярьсан билээ. Энэ үеэр Украины мөргөлдөөнийг зохицуулах асуудлыг хөндсөний сацуу дэлхий дахины аюулгүй, тогтвортой байдлыг хангах онцгой үүрэг хариуцлагынхаа хүрээнд харилцаагаа хэвийн болгох сонирхолтой байгаагаа илэрхийлсэн байна. ОХУ-ын Ерөнхийлөгч 30 хоногийн хугацаанд харилцан зогсоох тухай саналыг дэмжиж, Украины эрчим хүчний дэд бүтцэд цохилт өгөхөө зогсоох тушаалыг зэвсэгт хүчиндээ өгсөн гэдгээ Ерөнхийлөгч Д.Трампад мэдэгджээ.
В.Путин, Д.Трамп нар мөн "Хар тэнгист гал зогсоох, бүрмөсөн гал зогсоож, бат бөх энх тайван тогтоох" тухай техникийн хэлэлцээг эхлүүлэхээр тохиролцсон байна.
Эх сурвалж:
