Канадын Ерөнхий сайд Марк Карни дөрөвдүгээр сарын 28-нд ээлжит бус сонгууль зохион байгуулахаар шийдвэрлэснээ ням гарагт мэдэгдлээ. Энэ мэдэгдлээр таван долоо хоног үргэлжлэх сонгуулийн кампанит ажил албан ёсоор эхэллээ.
Английн банкны ерөнхийлөгч асан, одоогийн Либерал намын дарга М.Карни АНУ-ын Ерөнхийлөгч Дональд Трамптай хийх хэлэлцээнд “ард түмний тодорхой мандат шаардлагатай” хэмээн мэдэгдэж, “Трамп канадчуудыг хагалан бутаргаж, улсыг маань өөрийн эзэмшил болгохыг зорьж байна” хэмээн шүүмжилсэн нь улс төрийн халуун уур амьсгалыг улам хурцатгалаа.
Түүний гол өрсөлдөгч, Консерватив намын дарга Пьер Пуальевр сонгуулийн кампанит ажлынхаа үеэр “тууштай, хүчирхэг, хүндлэл хүлээсэн удирдагчийн хувиар АНУ-тай дипломат яриа хэлэлцээ хийх” бодолтой байгаагаа илэрхийлжээ.
Сонгуулийг товлоход нөлөөлсөн нэг гол хүчин зүйл нь АНУ-ын Ерөнхийлөгч Д.Трамп Канадын эсрэг худалдааны дайн эхлүүлж, “Канад бол АНУ-ын 51 дэх муж улс болох ёстой” гэж мэдэгдсэн явдал юм. Үүнээс үүдэн хоёр улсын харилцаа эрс муудаад байгаа билээ.
Энэ удаагийн сонгуульд:
-
Либерал намын дарга Марк Карни
-
Консерватив намын дарга Пьер Пуальевр
-
Шинэ Ардчилсан намын дарга Жагмит Сингх
-
“Квебекийн блок” намын дарга Ив-Франсуа Бланшет
нар өрсөлдөхөөр болсон байна.
Эх сурвалж: BBC.
