Япон, Хятадын эдийн засгийн өндөр түвшний яриа хэлэлцээ Токио хотноо бямба гаригт болжээ. Сүүлийн зургаан жилийн хугацаанд анх удаа болж буй ийм төрлийн уулзалтад Японы Гадаад хэргийн сайд Ивая Такеши, БНХАУ-ын Гадаад хэргийн сайд Ван И, хоёр улсын засгийн газрын эдийн засгийн болон бусад өндөр албан тушаалтнууд оролцлоо.

Уулзалтын үеэр хоёр тал нүүрстөрөгчийн давхар ислийн ялгарлыг бууруулах чиглэлээр төр, хувийн хэвшлийн хамтын ажиллагааг хөгжүүлэхээр тохиролцсон байна. Тэд мөн удахгүй Осака хотноо болох Дэлхийн экспогоор дамжуулан хүмүүс хоорондын болон бусад солилцоог хөхиүлэн дэмжихээ дахин нотолжээ.

Үүний зэрэгцээ Японы далайн гаралтай бүтээгдэхүүний импортыг аль болох ойрын хугацаанд сэргээхийг Японы тал Хятадаас дахин хүссэн байна. 2023 оны наймдугаар сард “Фүкүшима-1” АЦС-аас цэвэрлэсэн усыг далайд асгаж эхэлсний дараа Хятад улс ийм бүтээгдэхүүний импортыг зогсоосон юм. Харин Олон улсын атомын эрчим хүчний агентлагийн зүгээс, Японы ажиллагааг олон улсын аюулгүй байдлын стандартад нийцэж байна гэж мэдэгдсэн.

Токио мөн Хятадын хууль сахиулагчдад саатуулагдсан япон иргэдийг яаралтай суллаж, Хятадад амьдарч буй япон иргэдийн аюулгүй байдлыг хангахыг Бээжинд уриалсан байна. Албаны хүмүүсийн хэлснээр, ийм асуудлууд нь Японы компаниудыг Хятадад бизнесийн үйл ажиллагаа явуулахад нь саад тотгор болж байгаа ажээ.

Мөн өдрийн үдээс өмнө Ивая, Ван И нар хэлэлцээ хийсэн юм. Ивая Зүүн Хятадын тэнгис дэх Японы Сенкаку арлуудыг тойрсон нөхцөл байдал болон Хятадын цэргийн үйл ажиллагаа эрчимжиж байгаад санаа зовниж буйгаа илэрхийлсэн байна. Япон улс уг арлуудыг хянадаг бөгөөд Японы засгийн газар тэдгээрийг нутаг дэвсгэрийнхээ салшгүй хэсэг гэж үздэг.

Бямба гаригийн уулзалтын дараа Ивая сэтгүүлчдэд хэлэхдээ, хоёр тал хамтын ажиллагааны талаар төдийгүй тулгамдаж буй асуудал бэрхшээлүүдийг шийдвэрлэх арга замуудын талаар илэн далангүй ярилцсан тул яриа хэлэлцээ үр дүнтэй боллоо гэв. Токио өндөр түвшний хэлэлцээ, тэр дундаа дээд хэмжээний уулзалтаар дамжуулан хамтын ажиллагааны цар хүрээг үргэлжлүүлэн өргөжүүлэхийг эрмэлзэж байгаа бололтой. Япон улс хоёр орны найрсаг тогтвортой харилцааг бүс нутгийн энх тайван, хөгжил цэцэглэлтэд нэн чухал ач холбогдолтой гэж үзэж байна. Мөн Япон улс хоёр орны удирдагчид харилцан айлчлал хийх боломжийг үргэлжлүүлэн судлах ажээ.

Мөн Япон, Хятад, Өмнөд Солонгосын Гадаад хэргийн сайд нар Токиод уулзаж, ирээдүйд чиглэсэн хамтын ажиллагаагаа ахиулж, гурван талын дээд хэмжээний уулзалтыг Японд аль болох ойрын хугацаанд зохион байгуулах чиглэлд ажиллахаар тохиролцжээ. Япон улс энэ оны гурван талт уулзалтыг даргалж байгаа орны хувьд дээд хэмжээний уулзалтыг оны эцэс гэхэд зохион байгуулахыг зорьж байна.