АНУ-ын Төв банкны үүргийг гүйцэтгэгч Холбооны нөөцийн сан (ХНС) бодлогын хүүгээ хоёр дахь удаагаа хэвээр үлдээх шийдвэр гаргалаа. Ерөнхийлөгч Дональд Трампын худалдаа, эдийн засгийн бодлогын тодорхойгүй байдлаас үүдэн эдийн засгийн өсөлтийн төсөөллийг бууруулсан байна.

Төв банк бодлогын жишиг хүүгээ 4.25-4.5 хувийн хооронд хэвээр үлдээнэ. Эдийн засгийн идэвхжил тогтвортой өрнөж байгаа ч өсөлт саарах магадлалтай хэмээн анхааруулж, өмнө нь 2.1 хувь гэж тооцоолж байсан 10-12 дугаар сарын ДНБ-ий өсөлтийг 1.7 хувь болгон бууруулжээ.

ХНС-гийн дарга Жером Пауэлл эдийн засгийн тодорхойгүй байдал нэмэгдэж буйг онцлон тэмдэглэж, шинэ засаг захиргаа худалдаа, цагаачлал, төсвийн бодлого, зохицуулалтын чиглэлээр томоохон өөрчлөлтүүд хийж байгааг дурдсан байна. Эдгээр өөрчлөлт эдийн засагт хэрхэн нөлөөлөх нь тодорхойгүй байгаа ч татвар нэмэгдсэнтэй холбоотойгоор инфляц өсөж эхэлсэн тухай тэрбээр мэдээлжээ.

Эх сурвалж: Reuters