Туркийн хууль сахиулагчид Истанбул хотын захирагч, Ерөнхийлөгч Режеп Тайип Эрдоганы гол өрсөлдөгч Экрем Имамоглуг авлига, терроризмын хэрэгтэй холбоотой мөрдөн шалгах ажиллагааны хүрээнд лхагва гаргийн өглөө баривчилжээ. AFP, DPA мэдээллийн агентлагууд түүний туслахын мэдэгдлийг эш татан энэ талаар мэдээлсэн байна.

Цагдаа нар Истанбул дахь гэрт нь үүрээр нэгжлэг хийж, түүнийг цагдаагийн төв байранд хүргэсэн гэж Туркийн телевизүүд мэдээлжээ. Эрх баригчид баривчилгааны дараа эсэргүүцлийн жагсаал гарахаас сэргийлж, Истанбул хотод дөрвөн өдөр жагсаал хийхийг хориглосон байна. Мөн Netblocks ажиглалтын байгууллагын мэдээлснээр, Туркт нийгмийн олон сүлжээнд нэвтрэх боломжийг хязгаарласан гэжээ.

Э.Имамоглуг баривчилсан нь түүний 2028 оны Ерөнхийлөгчийн сонгуульд нэр дэвших боломжид томоохон саад учруулж буйг ажиглагчид онцолж байна. Истанбулын их сургууль тодорхой зөрчлүүдийг харгалзан, түүний их сургуулийн дипломыг хүчингүй болгож байгаагаа мэдэгдсэнээс нэг хоногийн дараа баривчилгаа болсон нь улс төрийн зорилготой алхам байж болзошгүй гэж сөрөг хүчнийхэн үзэж байна.

Туркийн хуулийн дагуу Ерөнхийлөгчийн сонгуульд нэр дэвшихийн тулд их дээд сургууль төгссөн байх шаардлагатай. Истанбулын их сургууль зөвхөн Э.Имамоглуг төдийгүй нийт 28 хүний эрдмийн зэргийг хүчингүй болгосон гэж мэдэгдсэн байна.

Э.Имамоглу нь зүүний төвч үзэл баримтлалтай Бүгд найрамдах ардын намын улстөрч бөгөөд энэ амралтын өдрүүдэд ерөнхийлөгчийн сонгуульд нэр дэвшихээ зарлах төлөвтэй байсан аж. Тэрбээр 2019, 2023 онд Истанбул хотын даргаар сонгогдож, Эрдоганы эрх баригч Шударга ёс, хөгжлийн намын нэр дэвшигчдийг ялж байв.

Эх сурвалж: DW