АНУ-ын Ерөнхийлөгч Дональд Трамп, Украины Ерөнхийлөгч Владимир Зеленский нар лхагва гарагт утсаар ярьж, дайныг зогсоох чиглэлд хамтран ажиллахаар тохиролцжээ. Цагаан ордон уг яриаг “гайхалтай” гэж тодорхойлов.
Хоёр удирдагчийн нэг цагийн ярианы үеэр В.Зеленский АНУ-аас үзүүлж буй тусламжид талархаж, ойрын өдрүүдэд Саудын Арабад хоёр талын төлөөлөгчдийн уулзалт хийхээр болсон байна. Тэрбээр мөн агаарын довтолгооноос хамгаалах нэмэлт тусламж хүссэн бөгөөд Д.Трамп Европ дахь цэргийн хэрэгслийн дэмжлэгийг нэмэгдүүлэх талаар амласан гэж Цагаан ордон мэдээлжээ.
Д.Трамп мягмар гарагт ОХУ-ын Ерөнхийлөгч Владимир Путинтэй утсаар ярьсан талаар В.Зеленскийд мэдээлэл өгсөн байна. Оросын тал 30 хоногийн гал зогсоох хэлэлцээрийг хүлээн зөвшөөрөхөөс татгалзсан боловч эрчим хүчний дэд бүтцэд цохилт өгөхөө зогсоох саналыг хүлээн авсан гэж Трамп мэдэгджээ.
Гэсэн хэдий ч Украины арми Оросын өмнөд нутагт нефтийн агуулах руу цохилт өгсөн гэж Москва мэдээлсэн бол Киевийн тал Оросын цэргүүд эмнэлэг, орон сууцны барилгад цохилт өгч, төмөр замын цахилгааныг тасалсан гэж мэдэгдсэн байна.
В.Зеленский хэлэхдээ:
- Украин фронтын шугамд болзолгүйгээр гал зогсоох саналыг хүлээн зөвшөөрч байгаа
- Оросын дэд бүтцэд цохилт өгөхөө зогсооно
- АНУ Запорожье атомын цахилгаан станцын үйл ажиллагааг сэргээхэд туслах боломжийг судлах
Д.Трамп мөн АНУ Украины атомын цахилгаан станцуудыг ажиллуулахад тусална гэж мэдэгджээ. Запорожье атомын цахилгаан станц 2022 онд Оросын хяналтад орсон бөгөөд Украины тал уг станцыг сэргээх асуудлаар АНУ-тай хэлэлцэж эхэлсэн байна.
Эх сурвалж: Reuters
