БНХАУ-ын дарга Ши Жиньпин хоёр орны эдийн засгийн байдал хурцдаж буй энэ үед АНУ-д "ойрын хугацаанд" айлчилж магадгүй гэж АНУ-ын Ерөнхийлөгч Дональд Трамп даваа гарагт мэдэгдлээ.

Д.Трамп нэгдүгээр сард үүрэгт ажилдаа орсноосоо хойш Бээжинг фентанил үйлдвэрлэхэд ашигладаг химийн бодисын нийлүүлэлтийг зогсоогоогүй гэж буруутгаж, Хятадаас оруулж буй бүх бараа бүтээгдэхүүнд 20 хувийн татвар ногдуулсан юм. Гэвч энэ шийдвэрийг БНХАУ эрс эсэргүүцэж, хариу татвар ногдуулах шийдвэр гаргасан байна.

Сүүлийн хэдэн долоо хоногт Д.Трамп, Ши Жиньпинтэй харилцаагаа сайжруулахад өөдрөг байр суурьтай байгаа ч татвар, Тайвань зэрэг маргаантай асуудлууд дээр ахиц дэвшил гараагүй хэвээр байна.

Вашингтон дахь Жон Кеннедийн нэрэмжит урлагийн төвд болсон хурлын үеэр Д.Трамп, Ши Жиньпиний айлчлалын талаар дурдсан боловч Цагаан ордон болон Хятадын Элчин сайдын яамнаас албан ёсны хариу өгөөгүй байна.

АНУ-ын Ерөнхийлөгчийн хэлснээр, татварын бодлого нь гадаад худалдааны тэгш бус байдлыг тэнцвэржүүлж, засгийн газрын орлогыг нэмэгдүүлэх зорилготой аж. Гэхдээ энэ нь инфляцыг өсгөж, эдийн засгийн өсөлтийг удаашруулж болзошгүй гэсэн хөрөнгө оруулагчдын болгоомжлолыг тэрбээр няцаасаар байна.

Эх сурвалж: Reuters