Киевийн холбоотон орнууд Украины дайныг зогсоохын тулд Орост шахалт үзүүлэхээр тохиролцсоноос хэдхэн цагийн дараа АНУ-ын Төрийн нарийн бичгийн дарга Марко Рубио ОХУ-ын Гадаад хэргийн сайд Сергей Лавровтой утсаар ярьжээ.

АНУ-ын Төрийн департаментын мэдээлснээр, Саудын Арабад саяхан болсон уулзалтын дараах цаашдын алхмуудыг хэлэлцэж, хоёр улсын харилцааг сэргээх чиглэлд үргэлжлүүлэн ажиллахаар тохиролцсон байна.

Мөн АНУ-ын тал ОХУ-д Ираны дэмжлэгтэй хуситуудын эсрэг Йеменд цэргийн ажиллагаа эхлүүлсэн тухай мэдээлсэн гэж Төрийн департаментын төлөөлөгч Тэмми Брюс мэдэгдэв. Харин ОХУ-ын Гадаад хэргийн яамнаас АНУ-ын санаачилгаар яриа өрнөсөн бөгөөд С.Лавров "хүч хэрэглэхийг нэн даруй зогсоож, улс төрийн яриа хэлэлцээ хийх нь чухал" гэж онцолсон гэж мэдээлжээ.

Үүний зэрэгцээ өнгөрсөн бямба гарагт Европын Холбооны удирдагчид, НАТО-гийн төлөөлөгчид Их Британийн Ерөнхий сайд Кир Стармерын санаачилгаар цахимаар уулзаж, Орост хамтын шахалт үзүүлэх замаар Украины дайныг дуусгах зорилт дэвшүүлжээ.

Эх сурвалж: DW