Оросын цэрэг Украинд цөмрөн орсноос хойш тус улсын эдийн засгийг сэргээн босгох, учирсан хохирлыг нөхөхөд 524 тэрбум ам.доллар шаардлагатай гэж Дэлхийн банк, НҮБ, Европын Комисс, Украины засгийн газрын шинжээчид тооцоолон танилцуулжээ. Энэ тоо Украины 2024 оны ДНБ-ээс гурав дахин их дүн болж байна.

Шинэ тооцоололд 2024 оны эцэс хүртэлх хохирлыг хамруулсан бөгөөд өмнө нь 486 тэрбум ам.доллар шаардлагатай гэж үзэж байсан бол энэ удаа 7 хувиар өссөн байна.

Хамгийн их хохирол учирсан салбарууд:

• Орон сууц – нийт сангийн 13 хувь буюу 2.5 сая барилга эвдэрч сүйдсэн. Зөвхөн нурангийг цэвэрлэх, хог хаягдлыг зайлуулахад 13 тэрбум ам.доллар хэрэгтэй.
• Тээвэр – 78 тэрбум ам.доллар шаардлагатай.
• Эрчим хүч, олборлох салбар – 68 тэрбум ам.доллар.
• Худалдаа, үйлдвэрлэл – 64 тэрбум ам.доллар.
• Хөдөө аж ахуй – 55 тэрбум ам.доллар.

Украины Ерөнхий сайд Денис Шмыгаль дайны үргэлжилж буй нөхцөлд сэргээн босголтын зардал нэмэгдсээр байгааг онцолжээ.

Одоогоор 2025 оны яаралтай сэргээн босголтод зориулж 7.37 тэрбум ам.доллар олон улсын доноруудын дэмжлэгтэйгээр бүрдүүлсэн ч дахин 10 тэрбум ам.доллар дутуу байна.

Эх сурвалж: VOA