Литва улс Кассетны буюу задардаг зэвсгийг үйлдвэрлэх, ашиглах, шилжүүлэхийг хориглох тухай конвенцоос албан ёсоор гарч байгаагаа зарлажээ. Тус улсын үндэсний радио, телевиз (LRT)-ийн мэдээлснээр, олон улсын гэрээнээс гарах шийдвэрийг Литвийн парламент 2024 оны зун баталж, холбогдох баримт бичгүүдийг НҮБ-д хүргүүлсэн байна.
Задардаг зэвсгийн тухай конвенц нь 2010 онд хүчин төгөлдөр болсон бөгөөд уг зэвсгийг ашиглах, үйлдвэрлэхийг хориглох зорилготой. Гэвч АНУ, Орос, Хятад зэрэг хэд хэдэн улс энэхүү гэрээнд нэгдээгүй байна.
Литва улс конвенцоос гарах болсон шалтгаанаа Украины эсрэг Оросын дайралтад энэ төрлийн зэвсгийг ашиглаж байгаатай холбон тайлбарлажээ. Литвийн эрх баригчдын мэдэгдсэнээр, улс орныхоо батлан хамгаалах чадамжийг нэмэгдүүлэх, болзошгүй түрэмгийллийг тогтоон барихын тулд бүх боломжит арга хэмжээг авах шаардлагатай гэж үзэж байгаа аж.
Задардаг зэвсэг нь агаараас эсвэл газраас харвагддаг, дэлбэрэх үед олон тооны жижиг тэсрэх төхөөрөмж тархаж унадаг онцлогтой. Энэхүү зэвсэг байлдааны нөхцөлд өргөн хэрэглэгддэг ч дэлбэрээгүй үлдэгдэл нь олон жилийн турш иргэдэд аюул учруулдаг тул хүний эрхийн байгууллагууд түүнийг хориглохыг шаарддаг.
Эх сурвалж: DW
