АНУ-ын Ерөнхийлөгч Дональд Трамп лхагва гарагт Европын авто машин болон бусад бараа бүтээгдэхүүнд 25 хувийн импортын татвар ногдуулахаар болсон тухайгаа мэдэгдэв.
Засгийн газрын анхны хуралдааны үеэр тэрбээр “Бид шийдвэрээ гаргасан. Энэ талаар удахгүй мэдэгдэл хийнэ. Татварын хувь хэмжээ ерөнхийдөө 25 хувь байх бөгөөд авто машин болон бусад бүх бараанд хамаарна” гэж сэтгүүлчдэд хэлжээ.
Мөн тэрээр Европыг АНУ-ыг ашиглаж ирсэн хэмээн буруутгаж, “Тэд бидний машиныг худалдан авдаггүй. Манай фермерүүдийн бүтээгдэхүүнийг ч бараг худалдаж авдаггүй. Харин бид тэднээс бүх барааг нь худалдаж авдаг” гэж мэдэгджээ.
Түүнчлэн Европын Холбоог (ЕХ) АНУ-ыг хууран мэхлэхийн тулд байгуулсан гэж мэдэгдсэн байна. ЕХ одоогоор АНУ-ын авто машины импортод 10 хувийн татвар ногдуулж байгаа нь Америкийн тогтоосон 2.5 хувийн татвараас дөрөв дахин их байгаа аж.
Европын Холбоо АНУ-ын шийдвэрт хариу арга хэмжээ авна
ЕХ-ны гүйцэтгэх засаглалын байгууллага болох Европын Комисс АНУ-ын шинэ татварын бодлогын эсрэг хариу арга хэмжээ авна гэдгээ мэдэгдсэн байна.
Мэдэгдэлд "ЕХ бол дэлхийн хамгийн том чөлөөт зах зээл бөгөөд АНУ-д ашиг тусаа өгсөөр ирсэн" гэж онцолжээ. Мөн ЕХ-ны нэгдсэн зах зээл нь худалдааг хөнгөвчилж, АНУ-ын экспортлогчдын зардлыг бууруулж, 27 орны стандарт, зохицуулалтыг уялдуулсан гэж дурдсан байна.
Европын Комиссын хэвлэлийн төлөөлөгч "ЕХ чөлөөт, шударга худалдаанд учирч буй үндэслэлгүй саад тотгоруудын эсрэг хатуу хариу арга хэмжээ авах болно" хэмээн мэдэгджээ.
Эх сурвалж: DW
