Израилын аюулгүй байдлын албаны мэдээлснээр, ХАМАС бүлэглэл энэ сарын пүрэв гарагт шилжих шөнө барьцаанд байхдаа амиа алдсан дөрвөн хүний цогцсыг Улаан Загалмайн нийгэмлэгийн ажилтнуудад хүлээлгэн өгчээ.

Цогцсуудыг Израилын Батлан хамгаалах хүчин (IDF) "Керем-Шалом" шалган нэвтрүүлэх цэгт хүлээн авах бөгөөд гал зогсоох хэлэлцээрийн хүрээнд хүлээлгэн өгөх ёстой хүмүүсийн цогцос мөн эсэхийг таних ажиллагаа явагдах аж.

“The Times of Israel” сонинд мэдээлснээр, 69 настай Итзик Эльгарат, 49 настай Цахи Идан, 85 настай Шломо Манцур болон өөр нэг хүний цогцсыг Израилын талд шилжүүлэх юм. Манцур нь 2023 оны аравдугаар сарын 7-нд ХАМАС-ын халдлагын үеэр барьцаалагдаж, хөнөөгдсөн гэж таамаглагдаж буй бөгөөд тэрээр барьцаалагдсан хүмүүсийн дундаас хамгийн ахмад нь байжээ.

Гал зогсоох хэлэлцээрийн хэрэгжилт

Израилын шоронгоос суллагдсан Палестины хоригдлууд Баруун эргийн Рамалла хотод хүрсэн гэж AFP агентлаг мэдээлсэн байна. Барьцаанд байхдаа амиа алдсан дөрвөн хүний цогцсыг хүлээлгэн өгөх талаар ХАМАС бүлэглэл хоёрдугаар сарын 25-нд мэдэгдэж, Израилын албан тушаалтнууд үүнийг баталжээ.

Харин хоёрдугаар сарын 23-нд Израилын Ерөнхий сайд Биньямин Нетаньяху ХАМАС бүлэглэл барьцаалагдсан хүмүүсийг хүлээлгэн өгөхдөө "тохуурсан үйлдэл" хийж байгаа тул Газын зурваст гал зогсоох хэлэлцээрийн хүрээнд товлогдсон 600 гаруй хоригдлыг суллах хугацааг хойшлуулж байна гэж мэдэгдсэн юм.

Хоёрдугаар сарын 22-нд ХАМАС бүлэглэл Израилын зургаан иргэнийг барьцаанаас суллаж, хэлэлцээрийн эхний үе шат дууссаныг мэдэгдсэн. Гэвч Израилын тал мөн өдөр 602 палестин хоригдлыг суллах ёстой байсан ч хэлэлцээрийг зөрчиж, хугацааг сунгасан гэж ХАМАС буруутгасан байна.

Гуравдугаар сарын 2-ныг хүртэл үргэлжлэх хэлэлцээрийн эхний шатанд Израилын 25 иргэнийг суллаж, найман хүний цогцсыг хүлээлгэн өгөх ёстой гэж тохиролцоонд тусгагдсан байна.

Эх сурвалж: AR, The Times of Israel, AFP