Энэтхэг 1.4 тэрбум хүн амтай ч тэдний ихэнх нь хэрэглээний бараа, үйлчилгээ худалдан авах хангалттай орлогогүй байна. Blume Ventures хөрөнгө оруулалтын компанийн шинэ тайланд дурдсанаар тус улсын бодит хэрэглэгчдийн тоо ердөө 130-140 сая хүнтэй, буюу бараг Мексикийн хүн амтай тэнцэхүйц аж.
Үүнээс гадна, 300 сая орчим хүн "хэрэглэгч болох боломжтой" гэж тооцогдож байгаа ч тэдний зарцуулалтын дадал хэврэг, санхүүгийн боломжоос шалтгаалж маш хязгаарлагдмал байна.
Тайланд онцолсноор, Энэтхэгийн эдийн засагт дээд давхаргын орлого нэмэгдэж байгаа ч шинэ чинээлэг давхарга үүсэхгүй байна. Өөрөөр хэлбэл, баячууд улам баяжиж байгаа ч дундаж орлоготой иргэдийн тоо өсөхгүй байгаа нь хэрэглэгчдийн зах зээлийн бүтцийг өөрчилж байна.
Дээд зэрэглэлийн зах зээл давамгайлж байна
Энэхүү өөрчлөлт нь "дээд зэрэглэлийн хэрэглээний эрэлт" хурдацтай өсөхөд нөлөөлжээ. Үүний улмаас компаниуд масс зах зээлээс илүү өндөр үнэтэй, өндөр чанартай бүтээгдэхүүнд төвлөрч эхэлсэн байна.
Энэхүү хандлага дараах үзүүлэлтээр илэрч байна:
- Тансаг зэрэглэлийн хаалттай хотхонуудын борлуулалт өсөж байгаа ч энгийн хямд орон сууцны эзлэх хувь 40%-иас 18% хүртэл буурсан.
- Өндөр үнэтэй утасны борлуулалт нэмэгдэж, хямд загваруудын эрэлт суларсан.
- Брэндийн бараанууд зах зээлийн томоохон хэсгийг эзэлж байна.
- Тансаг хэрэглээ, үйлчилгээний салбар өргөжин тэлж, олон улсын оддын тоглолтын өндөр үнэтэй тасалбарууд өндөр борлуулалттай байна.
Ядуурч буй дундаж анги, хэрэглээний уналт
Тус тайлан Энэтхэгийн эдийн засгийн өсөлтийн "K-хэлбэрийн сэргэлт"-ийг баталж байна. Өөрөөр хэлбэл, баячуудын орлого нэмэгдсэн боловч дундаж болон бага орлоготой иргэдийн худалдан авах чадвар эрс мууджээ.
1990 онд Энэтхэгийн дээд 10% иргэд нийт үндэсний орлогын 34%-ийг эзэмшиж байсан бол одоо энэ тоо 57.7% болж өссөн. Харин доод 50%-ийн эзлэх хувь 22.2%-иас 15%-д хүртэл буурчээ.
Энэтхэгийн хүн амын ихэнх хэсэг санхүүгийн хуримтлалаа алдаж, өр зээлд дарагдсан нь хэрэглээний өсөлтийг улам удаашруулж байна. Мөн Энэтхэгийн Төв банк зээлийн хатуу бодлого баримталж, цар тахлын дараах хялбар зээл олголтыг зогсоосон нь бага, дунд орлоготой иргэдийн хэрэглээг улам хязгаарлах болжээ.
Технологийн дэвшил ба хөдөлмөрийн зах зээлд үзүүлэх нөлөө
Худалдан авах чадварын бууралтаас гадна цагаан захтнуудын ажлын байр хомсдож буй нь эдийн засагт томоохон эрсдэл учруулж байна. Хиймэл оюун ухаан, автоматжуулалт нь оффисын ажилчдын ажлын байрыг эрс бууруулж байгаа бөгөөд үүнтэй зэрэгцэн үйлдвэрийн салбарын менежер, удирдлагын түвшний ажлын байр багассаар байгаа аж.
Энэтхэгийн засгийн газрын эдийн засгийн тайланд технологийн дэвшил үйлчилгээний салбарт ажиллагсдын ажлын байрыг эрсдэлд оруулж буйг онцолжээ. Хэрэв энэ байдал үргэлжилбэл, улсын хэмжээнд хэрэглээ багасаж, макро эдийн засагт сөрөг нөлөө үзүүлэх магадлалтай гэж үзэж байна.
Ирээдүйн төлөв
Ойрын хугацаанд хоёр хүчин зүйл эдийн засгийн өсөлтийг дэмжиж магадгүй:
- Түүхэн дээд ургац хураалт – Хөдөө аж ахуйн салбар хүчтэй сэргэж, хөдөөгийн хэрэглээ нэмэгдэж болзошгүй.
- 12 тэрбум ам.долларын татварын хөнгөлөлт – Саяхан батлагдсан төсвийн хүрээнд татварын ачаалал буурч, хэрэглэгчдийн зарцуулалт нэмэгдэж магадгүй.
Гэсэн хэдий ч эдгээр хүчин зүйлс богино хугацаанд бага зэрэг өсөлт авчирч болох ч, дундаж анги сулрах, өр зээл нэмэгдэх, ажлын байр хомсдох зэрэг асуудлууд урт хугацааны сорилт хэвээр үлдэнэ.
Эх сурвалж: BBC News
