АНУ-ын санаачилсан тогтоол батлагдав
НҮБ-ын Аюулгүйн Зөвлөл АНУ-ын санал болгосон “Энх тайванд хүрэх зам” нэртэй тогтоолын төслийг баталжээ. Тус тогтоолд Украин дахь дайныг нэн даруй зогсоохыг уриалсан боловч ОХУ-ыг түрэмгийлэгч хэмээн тодорхойлоогүй байна.
Даваа гарагт болсон санал хураалтад Аюулгүйн Зөвлөлийн 15 гишүүн оролцсон бөгөөд 10 улс, түүний дотор АНУ, ОХУ, БНХАУ дэмжсэн бол Их Британи, Франц зэрэг таван улс түдгэлзжээ.
Энэ нь Украинд дайн эхэлснээс хойш НҮБ-ын Аюулгүйн Зөвлөлийн баталсан анхны тогтоол юм. ОХУ-ын байнгын төлөөлөгч Василий Небензя тогтоолын батламжийг мөргөлдөөнийг тайван замаар зохицуулах эхлэл хэмээн онцолсон байна.
НҮБ-ын Ерөнхий Ассамблей Украины асуудлаар хоёр өөр тогтоол батлав
ЕХ, Украин хамтран боловсруулсан тогтоол
- ОХУ-аас Украинд эзлэн авсан нутаг дэвсгэрээс цэргээ нэн даруй гаргахыг шаардсан
- 93 улс дэмжиж, 65 улс түдгэлзэн, 18 улс (Орос, АНУ зэрэг) эсэргүүцсэн
- Өмнө нь НҮБ-аас гаргасан шийдвэрүүдийн агуулгатай нийцэж буй
АНУ-ын бэлтгэсэн тогтоол
- ОХУ-ын түрэмгийллийг буруушаагаагүй
- Дайныг "мөргөлдөөн" хэмээн нэрлэсэн
- Оросын эзлэн авсан нутаг дэвсгэрийн тухай дурдалгүй орхигдуулсан
- Европын орнуудын шахалтаар “Украины бүрэн бүтэн байдал, шударга энх тайван”-д хүрэх тухай заалт нэмэгдсэн
- 93 улс дэмжсэн, АНУ, Украин зэрэг 72 улс түдгэлзэж, ОХУ эсэргүүцэв
Эдгээр тогтоол нь Украины нөхцөл байдлын талаар НҮБ дэх улс орнуудын байр суурь зөрүүтэй байгааг харуулж байна.
Эх сурвалж: DW
