Оросын цэргүүд Украинд халдан довтолсноос хойш гурван жил өнгөрч байгаатай холбогдуулан АНУ дайныг зогсоох тухай өөрийн бэлтгэсэн тогтоолын төслийг танилцуулжээ.
Өмнө нь Украин болон Европын холбоо (ЕХ) өөрсдийн тогтоолын төслийг боловсруулж, даваа гарагт НҮБ-ын Ерөнхий Ассамблейд өргөн барихаар төлөвлөсөн байна.
АНУ-ын тогтоолын төслийн гол заалтууд
Гурван заалтаас бүрдэх уг төсөлд:
- “Орос-Украины мөргөлдөөн”-д хүний амь эрсэдсэнд харамсаж байгааг илэрхийлэх
- НҮБ-ын гол зорилгыг олон улсын энх тайван, аюулгүй байдлыг сахин хамгаалах, маргааныг тайван замаар шийдвэрлэх явдал гэж онцлох
- Мөргөлдөөнийг нэн даруй зогсоохыг шаардаж, Орос, Украины хооронд бат бөх энх тайван тогтоохыг уриалах
ОХУ-ын хариу санал
Оросын тал “мөргөлдөөнийг нэн даруй зогсоохыг уриалж байна” гэсэн үгийн араас “түүний үндсэн шалтгааныг арилгах замаар” гэсэн тодотголыг нэмж оруулахыг санал болгосон байна.
ОХУ-аас НҮБ-д суугаа төлөөлөгч Василий Небензя АНУ-ын төслийг "зөв алхам" гэж үзэж буйгаа илэрхийлжээ. Нэрээ нууцлахыг хүссэн Оросын дипломатчийн мэдээлснээр, хэрэв Ерөнхий Ассамблей Оросын санал болгосон нэмэлт өөрчлөлтийг хүлээн зөвшөөрвөл Москва уг тогтоолыг дэмжих боломжтой гэжээ.
Украин, ЕХ-ны тогтоолын төсөл
НҮБ-ын Ерөнхий Ассамблей Украин болон ЕХ-ны бэлтгэсэн тогтоолын төслийг даваа гарагт хэлэлцэж санал хураалт явуулахаар төлөвлөжээ.
Уг төсөлд:
- Хурцадмал байдлыг намжаах
- Байлдааны ажиллагааг нэн даруй зогсоох
- НҮБ-ын дүрэм, олон улсын хууль тогтоомжийн дагуу тайван замаар зохицуулахыг уриалах
- Украины нутаг дэвсгэрээс Оросын цэргийг гаргах, цэргийн ажиллагааг зогсоохыг шаардсан өмнөх НҮБ-ын тогтоолуудыг хэрэгжүүлэх зэрэг заалтууд багтжээ.
ЕХ-ны улс орнууд АНУ-ын алхмыг хэлэлцэж байна
Баасан гаргийн орой НҮБ-д суугаа ЕХ-ны орнуудын төлөөлөгчид уулзаж, АНУ-ын тогтоолын талаар хэлэлцэхээр болсон гэж дипломатчид мэдээлсэн байна.
Тогтоолын улс төрийн ач холбогдол
НҮБ-ын Ерөнхий Ассамблейн тогтоолууд нь улс орнуудад заавал биелүүлэх үүрэг хүлээлгэдэггүй ч олон улсын үзэл бодлыг тусгаж, улс төрийн хувьд жинтэй нөлөө үзүүлдэг гэж ажиглагчид үзэж байна.
Украин болон ЕХ тогтоолын төсөлдөө “дайныг энэ онд зогсоох нь зайлшгүй шаардлагатай” гэдгийг онцлоод, энх тайвныг тогтооход дипломат хүчин чармайлтыг хоёр дахин нэмэгдүүлэх ёстой гэж мэдэгджээ.
Эх сурвалж: Reuters
