Даваа гарагт АНУ-ын Миннеаполис хотоос Канадын Торонто хот руу нислэг үйлдэж байсан Delta Air Lines компанийн зорчигч тээврийн нисэх онгоц газардах үедээ осолдсон байна.

Онгоц бүрэн хөмөрсөн хэдий ч 76 зорчигч, нисэх багийн дөрвөн гишүүн нийт 80 хүн бүгд амьд гарчээ.

Ослын дараа зорчигчдоос 21 хүн хөнгөн бэртэл авсан бөгөөд тэдний гурав нь биеийн байдал хүнд байгаа тухай мэдээлжээ. Гэсэн хэдий ч тэд эмнэлэгт хүргэгдсэний дараа тогтвортой байдалд орсон байна.

Ослын нөхцөл байдал ба шалтгаан

Ослын шалтгааныг тодруулах мөрдөн шалгах ажиллагаа үргэлжилж байна. Шинжээчдийн урьдчилсан дүгнэлтээр, ослын гол шалтгаан нь өвлийн хүйтэн, ширүүн цаг агаар, онгоцны хэт хурдтай газардах зэрэг хүчин зүйлс байж болзошгүй гэж үзэж байна.

Ослын үеэр онгоцны хар хайрцгуудыг олж авсан бөгөөд нисэх буудлын талбайгаас онгоцны сэгийг зайлуулжээ. Лхавга гарагийн орой ослын талбайг бүрэн цэвэрлэж, нислэгийн үйл ажиллагааг хэвийн горимд оруулсан байна.

Delta Air Lines компани нөхөн төлбөр олгоно

Delta Air Lines компани нь онгоцонд зорчиж явсан бүх зорчигчид тус бүрт нь 30,000 ам.долларын нөхөн олговор олгох шийдвэр гаргасан байна. Энэ нь нөхцөл болзолгүйгээр олгож буй нөхөн төлбөр гэж тус компани мэдэгджээ.

Delta Air Lines компанийн хуульч Винсент Женова хэлэхдээ, зорчигчдод олгож буй нөхөн төлбөр нь урьдчилгаа хэлбэртэй бөгөөд ослын мөрдөн шалгах ажиллагаа бүрэн дууссаны дараа нэмэлт нөхөн төлбөрийн асуудлыг хэлэлцэх боломжтой гэж тайлбарлажээ.

Ослын үеэр нисгэгчдийн үүрэг, компанийн байр суурь

Delta Air Lines компанийн гүйцэтгэх захирал Эд Бастиан ослын дараа мэдэгдэл хийхдээ нисгэгчдээ "баатарлаг" хэмээн онцолж, мэргэжлийн өндөр ур чадвар гарган ажилласныг тэмдэглэсэн байна.

Тэрбээр мөн осолд өртсөн зорчигчдод шаардлагатай тусламж үзүүлэхээ илэрхийлжээ.

Хойд Америкт болсон дөрөв дэх томоохон осол

Энэхүү осол нь сүүлийн гурван долоо хоногийн хугацаанд Хойд Америкт гарсан дөрөв дэх томоохон нисэхийн осол болж байна.

Мэргэжилтнүүд нисэхийн аюулгүй байдлыг эргэн харж, ийм төрлийн ослоос урьдчилан сэргийлэх арга хэмжээг чангатгах шаардлагатайг онцолж байна.