Америкийн түргэн хоолны томоохон сүлжээ KFC өөрийн төв байрыг Кентукки муж улсын Луисвилл хотоос Техас муж улсын Плано хот руу нүүлгэхээр болсон тухай толгой компани болох “Yum Brands” корпорац мэдэгдлээ.

Ингэснээр төв оффисын 100 орчим ажилтан болон зайнаас ажилладаг олон арван ажилтан нүүх шаардлагатай болж байгаа бөгөөд шилжин суурьшихад зориулсан тэтгэмж авах ажээ.

Брэндүүдийн шинэ зохион байгуулалт
“Yum Brands” корпорац брэндүүдийн төвлөрлийг өөрчлөх төлөвлөгөөний хүрээнд KFC болон Pizza Hut-ийг Техасын Плано хот руу, Taco Bell болон Habit Burger & Grill-ийг Калифорнийн Ирвайн хотод үлдээхээр болсон байна.

Яагаад Техасыг сонгов?
Техас муж сүүлийн жилүүдэд олон томоохон корпорацуудын төв байрыг татах болсон нь татварын таатай нөхцөл, бизнест ээлтэй бодлоготой холбоотой юм. Энэ талаар “Yum Brands”-ийн гүйцэтгэх захирал Дэвид Гиббс “Энэхүү өөрчлөлт нь үйлчлүүлэгчид, ажилчид, франчайз эзэмшигчид болон хувьцаа эзэмшигчдэд илүү сайн үйлчилгээ үзүүлэхэд дөхөм болно” хэмээн онцолжээ.

Кентукки мужийн захирагчийн шүүмжлэл
Тус компанийн төв байр нүүх шийдвэрийг Кентукки муж улсын захирагч Энди Бешиа шүүмжилж, “Энэ шийдвэрт сэтгэл дундуур байна. KFC-гийн нэр нь өөрөө Кентукки нэрээр эхэлдэг бөгөөд бүтээгдэхүүнээ борлуулахдаа манай мужийн өв соёлыг сурталчилсаар ирсэн” хэмээн мэдэгдэв.

KFC-гийн түүхэн холбоо
KFC брэндийн түүх 1930-аад оноос эхлэлтэй бөгөөд үүсгэн байгуулагч хурандаа Харланд Сандерс Корбин хот дахь жижиг хоолны газарт анх шарсан тахианы мах борлуулж эхэлжээ. Өдгөө дэлхийн 145 гаруй улс орон, нутаг дэвсгэрт 24 мянга гаруй салбартай болсон тус брэндийн барилга бүр дээр Х.Сандерсийн дүрстэй лого байдаг.

Цар тахлын дараах компаниудын шилжилт
Америкийн олон компани сүүлийн жилүүдэд төв байраа нүүлгэн шилжүүлж буй. Үл хөдлөх хөрөнгийн үйлчилгээ үзүүлдэг CBRE фирмийн тайланд дурдсанаар, бизнесийн ээлтэй орчин бүрдүүлсэн Техасын Остин болон бусад хотуудад олон компани амжилттай үйл ажиллагаа явуулж байна.

Эх сурвалж: BBC