Өмнөд Солонгосын бэлэн гоймонгийн үйлдвэрлэлээр тэргүүлэгч "Ноншим" компани Европын зах зээлд нэвтрэх стратегийн хүрээнд ирэх гуравдугаар сард Нидерландад охин компаниа байгуулах гэж буйгаа мэдэгдлээ.

Тодруулбал, тус компани Амстердам хотод "Nongshim Europe B.V." компанийг байгуулж, Европ дахь ложистикийн дэд бүтцээ сайжруулах зорилготой байна. Нидерланд нь хуурай замын тээврийн дэвшилтэт сүлжээтэй, түүнчлэн Европ дахь хамгийн том боомт болох Роттердам байрладаг тул уг байршлыг сонгожээ.

Европын рамёны зах зээл эрчимтэй өсөж байна

Сүүлийн жилүүдэд Европт Азийн хоолны хэрэглээ нэмэгдэж, 2023 онд тус бүс нутгийн бэлэн гоймонгийн зах зээл 2 тэрбум ам.долларт хүрчээ. Энэ нь 2019-2023 онд жил бүр дунджаар 12 хувиар өссөн үзүүлэлт юм. "Ноншим" 2030 он гэхэд Европ дахь борлуулалтаа дөрөв дахин нэмэгдүүлэх зорилт тавиад байна.

2023 онд "Ноншим" Европын зах зээлд 84 сая ам.долларын борлуулалт хийжээ. Тус компанийн нийт борлуулалтын 40 орчим хувь нь АНУ, Хятад, Япон зэрэг олон улсын зах зээлээс бүрддэг бөгөөд АНУ-д хоёр, Хятадад дөрвөн үйлдвэр ажиллуулж байна.

Санхүүгийн үзүүлэлтүүд бууралттай байна

2024 онд "Ноншим"-ийн цэвэр ашиг өмнөх оны мөн үеийнхтэй харьцуулахад 8.1 хувиар буурч, 157.63 тэрбум вон болсон бол үйл ажиллагааны ашиг 23 хувиар буурч, 163.07 тэрбум вон болжээ. Харин борлуулалтын орлого 0.8 хувиар өсөж, 3.44 их наяд вон болсон байна.

Эх сурвалж: Yonhap