ОХУ 2024 онд батлан хамгаалахынхаа төсвийг 42 хувиар нэмэгдүүлж, 12.1 их наяд рубльд хүргэсэн нь дэлхийн хэмжээнд 462 тэрбум ам.доллартай дүйцэхүйц гэж Британийн Стратеги судалгааны олон улсын хүрээлэн тооцоолжээ. Харин 2025 онд энэ төсөв дахин өсөж 13.7 хувиар нэмэгдэн 15.6 их наяд рубль буюу 550 тэрбум ам.доллар хүрэх хүлээлттэй байна. Энэ нь Оросын ДНБ-ий 7.5 хувийг эзлэх хэмжээ бөгөөд улсын нийт төсвийн 40 орчим хувьтай тэнцэж байгаа аж.
Тэгвэл Европын Холбооны болон Их Британийн батлан хамгаалахын төсөв мөн өсөлттэй байна. 2024 онд Европын орнууд батлан хамгаалахын зардлаа 12 хувиар нэмэгдүүлж, нийт 457 тэрбум ам.доллар зарцуулжээ. Үүний дотор Германы батлан хамгаалахын төсөв хамгийн өндөр өсөлттэй байсан бөгөөд 23 хувиар нэмэгдэж, 86 тэрбум ам.доллар болжээ. Ингэснээр сүүлийн 30 жилийн турш анх удаа Их Британийн батлан хамгаалахын төсвөөс (81 тэрбум ам.доллар) давсан байна.
Европын орнуудаас хоёрт бичигдэж буй Франц 64 тэрбум ам.доллар зарцуулсан нь өмнөх оныхоос 4.5 хувиар өссөн үзүүлэлт бөгөөд ДНБ-ий 2 хувь-тай тэнцэж байгаа аж. Энэ үзүүлэлтээрээ тэргүүлж буй Эстони улс батлан хамгаалахын төсөвтөө ДНБ-ийхээ 4 орчим хувийг, Польш улс 3.25 хувийг зарцуулсан байна.
Гэхдээ Европын орнуудын нийт батлан хамгаалахын зардал нэмэгдэж байгаа хэдий ч АНУ-ын Ерөнхийлөгч Д.Трампын шаардсан ДНБ-ий 5 хувьд хүргэх боломжгүй гэж дүгнэжээ. Судалгаанд дурдсанаар, хэрэв АНУ Украинд үзүүлэх цэргийн дэмжлэгээ бууруулбал Европын аюулгүй байдалд эрсдэл нэмэгдэх магадлал өндөр байгаа аж.
Эх сурвалж: Британийн Стратеги судалгааны олон улсын хүрээлэн, Financial Times
