Румыний Ерөнхийлөгч Клаус Йоханнис импичментийн үйл явцаас зайлсхийхийн тулд Лхагва гарагт албан тушаалаасаа огцорно гэдгээ мэдэгдлээ.

К.Йоханнис 2014 оноос хойш ерөнхийлөгчөөр ажиллаж байгаа бөгөөд өнгөрсөн оны сүүлээр болсон ерөнхийлөгчийн сонгуулийн дараа бүрэн эрхийн хугацаа нь дуусах ёстой байсан. Гэвч Оросын хөндлөнгийн оролцоо байж болзошгүй гэх үндэслэлээр Үндсэн хуулийн цэц санал хураалтыг дахин явуулах нь зүйтэй гэж үзэж, бүрэн эрхийг нь сунгасан байна.

Сонгуулийн улмаас улс төрийн тогтворгүй байдал үүсэв

2023 оны 11 дүгээр сард болсон сонгуулийн эхний шатанд хэт барууны үзэл баримтлагч, бие даан нэр дэвшигч Кэлин Жоржеску ялалт байгуулсан нь улс төрийн эмх замбараагүй байдлыг өдөөсөн. Үүнтэй холбоотойгоор Румыний Үндсэн хуулийн цэц Оросын нийгмийн сүлжээнд явуулсан нөлөөллийн ажиллагаа сонгуулийн үр дүнд нөлөөлсөн гэж үзэн, санал хураалтын үйл явцыг хүчингүй болгож дахин эхлүүлэх шийдвэр гаргажээ.

Ийнхүү К.Йоханнис 2024 оны тавдугаар сарын 4-нд болох шинэ сонгууль хүртэл ерөнхийлөгчийн албан тушаалаа үргэлжлүүлэхээр болсон боловч хэт барууны үзэлтэй сөрөг хүчний намууд болон либерал үзэлт “Румынийг аврах холбоо” намын хууль тогтоогчид түүнийг албан тушаалаас нь түдгэлзүүлэх санал гаргасан байна.

Йоханнис: “Би Үндсэн хууль зөрчөөгүй”

К.Йоханнис уг алхмыг “үндэслэлгүй, хор хөнөөлтэй” гэж тодорхойлж, "миний бие хэзээ ч Үндсэн хууль зөрчөөгүй" хэмээн мэдэгджээ. Түүний огцролтын дараа Румыний парламентын дээд танхимын дарга Илие Боложан ерөнхийлөгчийн үүргийг сонгууль хүртэл түр гүйцэтгэх юм.

Эх сурвалж: Politico