Японы онцгой байдлын алба хаагчид Токиогоос хойд зүгт орших Яшио хотын авто зам дээр үүссэн нүхэнд ачааны машинтайгаа унаж сураг тасраад буй 74 настай жолоочийг аврахаар аврах ажиллагаа явуулж байна. Аврагчид хүнд техник нэвтрүүлэхийн тулд аюул багатай газраас нүх рүү орох налуу зам барих ажлыг эхлүүлжээ.

Олимпын усан сантай дүйцэх хэмжээний том нүх үүсжээ

Мягмар гаргийн өглөө авто замын уулзвар дээр үүссэн нүхний хэмжээ эхэндээ бага байсан ч томорсоор 40 метр өргөн болон өргөжиж, Олимпын усан сангийн хэмжээтэй тэнцэхүйц болжээ. Орон нутгийн эрх баригчдын мэдээлснээр, уг нүх бохир усны хоолойнууд зэвэрч муудсанаас үүссэн байх магадлалтай байна.

Орон нутгийн гал түймэртэй тэмцэх албаны ажилтан Тэцүжи Сато пүрэв гарагт болсон хэвлэлийн бага хурлын үеэр олон арван аврагчид өдөр шөнөгүй ажиллаж буйг мэдээлж, "Энэ бол маш аюултай нөхцөл байдал. Нүх улам томорч, дотор нь гүний ус урсаж байгаа нь аврах ажиллагааг хүндрүүлж байна" гэж онцолжээ.

Ачааны машины бүхээг шороонд дарагджээ

Мягмар гаргийн үдийн орчмоос хойш осолд орсон жолоочтой холбоо тогтоож чадаагүй бөгөөд түүний ачааны машины бүхээг шороо болон хог хаягдалд дарагдсан болохыг аврагчид тогтоосон байна.

Онцгой байдлын алба хаагчид нөхцөл байдлыг сайтар судалж, ослын бүсэд хүнд техник нэвтрүүлэх хамгийн аюулгүй гарцыг олохоор ажиллаж байгаа аж. Аврагчид жолоочийг эсэн мэнд олж, түүнийг аюулгүй гаргахын тулд цаг минут тутамд төлөвлөгөөгөө нарийвчлан боловсруулж байгаа гэж мэдээлжээ.

Эх сурвалж: AFP