Иений ханш суларсан хэдий ч гадаадын ажиллах хүчийг татах бодлого хэрэгжүүлж буй энэ үед Японд ажиллаж буй гадаад иргэдийн тоо 2023 оны 10 дугаар сарын эцсийн байдлаар 2.3 саяд хүрч, өмнөх оны мөн үетэй харьцуулахад 12.4 хувиар өссөн тухай Японы Засгийн газраас өнөө өглөө мэдээлэв.

Гадаад ажилчдын тоо 2013 оноос хойш тасралтгүй нэмэгдэж, жил бүр дээд үзүүлэлтээ шинэчилж байгаа аж. Гадаадаас ирэгсдэд сувилахуй, барилга зэрэг салбарт ажиллах боломжийг олгодог тусгай мэргэшсэн ажилтны виз авсан хүмүүсийн тоо сүүлийн тайлант жилд 49.4 хувиар өсөж, 206 995-д хүрчээ гэж Японы Эрүүл мэнд, хөдөлмөр, нийгмийн хамгааллын яам мэдээлсэн байна.

Японд үйл ажиллагаа явуулж буй гадаад ажилтантай компаниудын тоо 342 087 болж, өмнөх оны мөн үеийнхээс 7.3 хувиар өссөн нь ажиллах хүчний өсөлтөд нөлөөлсөн байна. Эдгээр байгууллагын 62.4 хувь нь 30-аас доош ажилтантай жижиг компаниуд ажээ.

Иений ханшийн сулрал нь гадаад ажилчдын урсгалыг бууруулах магадлалтай ч Зүүн Өмнөд Азийн орнуудаас ирэгсдийн тоо өссөөр байна гэж Японы Хөдөлмөрийн яамны ажилтан онцолжээ.

Гадаадын ажилчдыг улс орноор нь авч үзвэл:
📌 Вьетнам – 570 708 (нийт ажилчдын 24.8%)
📌 Хятад – 408 805 (17.8%)
📌 Филиппин – 245 565 (10.7%)

Эх сурвалж: Kyodo News