Сирийн төрийн мэдлийн хэвлэлүүдийн мэдээлснээр, “Хаят Тахрир аль-Шам” бүлэглэлийн удирдагч Ахмед аль-Шарааг тус улсын шилжилтийн үеийн Ерөнхийлөгчөөр томилсон байна.
Аль-Шараагийн удирдлага дор Асадын дэглэм нуран унав
Олон улсад террорист бүлэглэл хэмээн тооцогддог “Хаят Тахрир аль-Шам” өнгөрсөн оны 12 дугаар сарын эхээр босогчдын довтолгоог удирдаж, Башар аль-Асадын дэглэмийг түлхэн унагасан юм. Аль-Шараа нь хээрийн командлагч байхдаа Абу Мохаммед аль-Жулани нэрээр танигдаж байжээ.
Шинэ засаглалын бүтэц
Ахмед аль-Шараад шинэ Үндсэн хуулийг батлах хүртэл хууль тогтоох түр зөвлөл байгуулах эрхийг олгожээ. Түүнийг Ерөнхийлөгчөөр томилсныг Дамаск хотод болсон уулзалтын үеэр зарласан бөгөөд энэхүү уулзалтад “Хаят Тахрир аль-Шам”-ын тэргүүлсэн босогчдын эвсэлд багтаж буй бусад зэвсэгт бүлэглэлийн командлагчид оролцсон байна.
Цэргийн бүтцийн өөрчлөлт
Сирийн шинэ удирдлага Башар аль-Асадын дэглэмийг түлхэн унагахад оролцсон бүх зэвсэгт бүлэглэл, өмнөх дэглэмийн арми, тусгай албыг татан буулгаж байгааг мэдэгджээ. Тэдний оронд аюулгүй байдлыг хангах шинэ бүтэц бий болгох төлөвтэй байгаа ч одоогоор дэлгэрэнгүй мэдээлэл өгөөгүй байна.
Эх сурвалж: BBC
