Хятадын жирэмсэн эмэгтэйчүүдийг АНУ-д ирж хүүхдээ төрүүлэхэд нь тусалсан гэх хэргээр Калифорни мужийн иргэн Фиби Дон 41 сарын хорих ял сонсжээ. Түүний хэрэг Лос-Анжелес дахь холбооны шүүх дээр шийдвэрлэгдэж, шүүгч Р.Гэри Клауснер түүнд нэн даруй хоригдох шийдвэр гаргасан байна.

Фиби Дон болон түүний нөхөр Майкл Лю нар “USA Happy Baby” нэртэй компани байгуулан “төрөлтийн аялал жуулчлал” хэмээх бизнес эрхэлж, хятад эмэгтэйчүүдийг АНУ-д ирж хүүхдээ төрүүлэхэд тусалж байсан нь хуйвалдаан болон мөнгө угаах гэмт хэрэг үйлдсэнд тооцогдсон юм.

Энэ хэрэг нь Ерөнхийлөгч Дональд Трампын "АНУ-д төрсөн хүүхдүүдэд шууд иргэншил олгох" тухай заалтыг зогсоох оролдлоготой зэрэгцэн олон нийтийн анхаарлыг татаж байна. Хэдийгээр Трампын гаргасан тушаалыг холбооны шүүх үндсэн хууль зөрчсөн гэж үзээд түр зогсоосон боловч "төрөлтийн аялал" гэмт хэрэг анхаарлын төвд хэвээр байгаа юм.

Фиби Дон болон нөхөр нь жирэмсэн эмэгтэйчүүдийг визийн анкет дээр жирэмсэн гэдгээ нуун АНУ-д нэвтрэхэд тусалж, хүүхдээ төрсний дараа АНУ-ын иргэн болгох боломжийг санал болгож байжээ. Тэдний үйлчлүүлэгчид зөвхөн Хятадаар хязгаарлагдаагүй бөгөөд Орос, Нигери зэрэг орнуудын иргэдэд ч үйлчилгээ үзүүлж байсан нь тогтоогдсон байна.

АНУ-ын Үндсэн хуулийн 14-р нэмэлт, өөрчлөлтийн дагуу тус улсад төрсөн хүүхэд бүр шууд Америкийн иргэн болох эрхтэй байдаг. Энэ нь хүүхдүүдийн ирээдүйн боловсролын боломж болон эцэг эхэд нь байнгын оршин суух эрх авах нөхцлийг бүрдүүлдэг тул "төрөлтийн аялал"-ыг ашиглах оролдлого тасралтгүй үргэлжилж байгааг харуулж байна.

Эх сурвалж: CNN