БНСУ-ын эрх баригчид Jeju Air компанийн осолдсон онгоцны урьдчилсан шалгалтын дүнг танилцууллаа. Тус онгоц өнгөрсөн сарын сүүлээр Бангкок хотоос Мүан руу нисэж байх үедээ газардахдаа осолдож, онгоцонд байсан нийт 181 зорчигчоос ердөө хоёр хүн л амьд үлдсэн юм.

Шалгалтын явцад онгоцны хоёр хөдөлгүүрт Байгалийн нугас (Baikal teal) хэмээх нүүдлийн шувууны үлдэгдэл илэрсэн байна. Эдгээр шувууд өвлийн улиралд БНСУ-ын нутаг дэвсгэрт нүүдэллэн ирдэг бөгөөд онгоц шувуутай мөргөлдсөний улмаас хөдөлгүүрүүд эвдэрсэн байх магадлал өндөр байгаа аж. Иймэрхүү төрлийн осол нь ховор боловч, нислэгийн багийн ур чадвараас шалтгаалан онгоцыг амжилттай газардуулсан жишээнүүд олон байдаг.

Ослын мөрдөн байцаалтад нислэгийн багийнхны ослын өмнөх шийдвэр, харилцаа чухал мэдээлэл болдог. Гэвч Jeju Air-ын онгоцны хар хайрцагт сүүлийн дөрвөн минутын бичлэг хадгалагдаагүй байсан нь мөрдөн шалгалтад хүндрэл учруулж байгаа юм. Хар хайрцгийн техникийн алдаа болон бусад хүчин зүйлсийг мөн шалгаж байгаа аж.

БНСУ-ын нисэхийн ослын мөрдөн байцаалтын журамд зааснаар ослоос хойш 30 хоногийн дотор урьдчилсан тайлан, жилийн дотор эцсийн тайланг гаргах ёстой. Одоогоор урьдчилсан дүгнэлтэд хөдөлгүүрийн эвдрэл, шувуутай мөргөлдсөн байж болзошгүй нөхцөл байдлыг анхааран үзэж байна.

Энэхүү осол нь онгоцны нислэгийн аюулгүй байдлыг сайжруулах, нисэх орчинд шувууны нүүдлийн бүсийн хяналтыг чангатгах шаардлагатайг харуулж байна.

Эх сурвалж: Reuters