АНУ-ын Ерөнхийлөгч Дональд Трамп бизнес эрхлэгчдийг Америкт бараа бүтээгдэхүүнээ үйлдвэрлэхийг уриалж, үүний хариуд татварыг бууруулах бодлого хэрэгжүүлнэ гэдгээ мэдэгдлээ. Харин бараагаа гадаадад үйлдвэрлэж, АНУ руу экспортлох тохиолдолд татвар ногдуулах болно гэж сануулсан байна.

Дэлхийн эдийн засгийн чуулга уулзалт Швейцарын Давос хотод зохион байгуулагдаж буй бөгөөд Д.Трамп Вашингтоноос цахимаар оролцон “Америк эргэн ирж, бизнест нээлттэй боллоо” гэж мэдэгдсэн байна. Тэрбээр “Америкт бүтээгдэхүүнээ үйлдвэрлэ, тэгвэл дэлхийн аль ч орноос бага татвар ногдоно. Харин гадаадад үйлдвэрлэсэн бараагаа экспортлох бол татвараа төлөх шаардлагатай” хэмээн онцолжээ.

Цагаан ордонд эргэн ирснээс гурав хоногийн дараа хийсэн энэхүү мэдэгдэлдээ тэрбээр аж ахуйн нэгжийн татварын хэмжээг 21 хувиас 15 хувь болгон бууруулах төлөвлөгөөгөө танилцуулсан байна. Гэвч энэ шийдвэрийг хэрэгжүүлэхийн тулд Конгресс дахь Бүгд найрамдах намын гишүүдийн дэмжлэг шаардлагатай юм. Одоогоор хууль тогтоогчид 2017 онд баталсан татварын хөнгөлөлтийг хэрхэн сунгах эсвэл өөрчлөх талаар хэлэлцэж эхэлсэн байна.

Д.Трамп Европт шаардлагатай шингэрүүлсэн хий нийлүүлэхээ амлаж, Европын холбооны 27 улсад үйл ажиллагаа явуулж буй Америкийн бизнес эрхлэгчдэд “шударга бус” ханддаг асуудлыг хөндсөн байна. Мөн түүний засаг захиргаа АНУ-ыг “үйлдвэрлэлийн супер гүрэн” болгох зорилготойг онцлон тэмдэглэжээ.

Түүнчлэн Саудын Араб болон Нефть экспортлогч орнуудын байгууллагад газрын тосны үнийг бууруулахыг хүсэх төлөвлөгөөтэй байгаагаа илэрхийлсэн байна. Газрын тосны үнэ буурвал Украины дайн дуусах боломжтойг тэрбээр дурдсан бөгөөд Орос улс нефтийн олборлолтоос олсон орлогоо дайныг санхүүжүүлэхэд ашиглаж байгааг онцолжээ.

Дэлхийн эдийн засгийн харилцааны талаар Д.Трамп “АНУ бусад улс орнуудад шударга хандахыг хүсдэг” гэдгийг тэмдэглээд, Хятадтай эрх тэгш харилцах зорилготойгоо илэрхийлсэн байна. “Бид давуу байдал олж авахыг хүсэхгүй, зүгээр л тэгш эрхтэй байхыг хүсэж байна” гэж тэрбээр хэлжээ.

Эх сурвалж: VOA