Шинэ Орлеан. Фото: USA Today
Шинэ оны эхний өдрүүд дэлхийн янз бүрийн хэсэгт хэд хэдэн эмгэнэлт дуулиантай хэргүүдийг авчирлаа. Шинэ Орлеонд ачааны машинаар цугларсан олныг дайрсан террор, Монтенегрод нэгэн эр зоогийн газарт олныг буудаж, Нью-Йоркт шөнийн клубт бас л олныг буудлаа. Эдгээр хэргүүдийг товчлон цуглуулбал...
Нэгдүгээр сарын 1-ний шөнө Америкийн Луизиана мужийн төв Шинэ Орлеон хотод пикап хөлөглөсөн эр төв гудамжинд цугларсан олныг дайраад дараа нь машинаас гарч буудсан хэрэг гарав. Одоо тодорхой болсноор, хэргийг зэвсэгт хүчний ахмад дайчин 42 настай Шамсуд-Дин Жабар үйлдсэн гэж сэжиглэгдэж байна. Түүнийг баривчлахдаа буудан хөнөөжээ. Өнөөдрийн байдлаар энэ террорт амь үрэгдэгчдийн тоо 15 хүн болоод байна. Холбооны мөрдөх товчоо хэрэгт өөр дөрвөн хүн хамаатай гэж үзэж байна.
Мөн л 1-ний өдөр Лас-Вегас дахь Trump International Hotel буудлын дэргэд Cybertruck машин дэлбэрэн шатаж, нэг хүн үрэгдсэн нь түүний жолооч болов. Өөр долоон хүн шархаджээ. Машинд хийн баллон, галт сумуудыг авч явжээ. Тэрбумтан Маск, дараа нь Ерөнхийлөгч Жо Байден энэ хоёр хэргийг холбоотой байж болох юм гэж мэдэгдсэн. Хожим машиныг дэлбэлсэн хүн амиа хорлосон болж таарлаа. Энэ хоёр хэргийг үйлдэгчид исламын террористуудыг дэмждэг үзэлтнүүд болж байна.
Нэгдүгээр сарын 2-ны шөнө үл танигдах хүн Нью-Йоркийн шөнийн клубын дэргэд хүмүүсийг бууджээ. Арав гаруй хүн шархадсан байв. Тэдний нэгийн биеийн байдал хүнд байна. Хэрэгтнийг одоо болтол барьж чадаагүй.
Мөн л нэгдүгээр сарын 2-ны шөнө Монтенегро улсын Цетин хотын зоогийн газар нэгэн эрэгтэй гал нээж арваад хүнийг хөнөөв. Тэдний хоёр нь хүүхэд. Хэвлэлд гарч буй мэдээгээр, амь үрэгдэгчдийн дунд түүний гэр бүлийнхэн байв. Дараа нь тэр өөрийгөө буудсан ба эмнэлэгт хүргэгдэх замдаа амь нь тасарчээ. Одоо тус оронд галт зэвсэг эзэмшихийг бүрэн хориглох талаар хэлэлцэгдэж байна.
Европын хотуудад шинэ оны шөнө автомашин шатаасан хэрэг олноор гарлаа. Хамгийн олон мянгаад машиныг Францад хулигаанууд шатаажээ. Иймэрхүү террор, танхайн дуулиантай хэргүүдээр 2025 он эхэллээ...
