Есдүгээр сарын 10-ны өдөр товлогдсон мэтгэлцээний дүрмийг АНУ-ын ерөнхийлөгчийн сонгуульд нэр дэвшигч Дональд Трамп, Камала Харрис нар эцэслэн тохиролцсоныг зохион байгуулагч ABC News суваг өчигдөр мэдээлжээ.
Сүүлийн өдрүүдэд хоёр нэр дэвшигч мэтгэлцээний үеэр микрофоныг хэрхэн ажиллуулах асуудлаар санал зөрөлдөөд байсан юм.
Камала Харрис өрсөлдөгчийнхөө тааламжгүй ааш авир, үг хэллэгийг нийтэд ил харуулахын тулд нэг нэр дэвшигчийн ярих ээлж болоход нөгөө нэр дэвшигчийн микрофоныг хаалгүй нээлттэй байлгахыг хүсэж байв.
Зургаадугаар сард болсон Трамп, Байден нарын мэтгэлцээний үеэр эсрэгээрээ ярих ээлж нь болоогүй нэр дэвшигчийн микрофоныг хаах дүрэм үйлчилж байжээ.
Трамп өрсөлдөгчийнхөө яриаг байнга тасалдуулж байсан тул Байдены хүсэлтээр ийм дүрэм гаргасан гэдэг.
Тэгвэл Трамп, Харрис нар өмнөх мэтгэлцээний дүрмийг хэвээр үлдээхээр тохиролцжээ.
Бусад тохиролцсон нөхцөлүүд гэвэл виртуал зоос шидэх аргаар Трамп мэтгэлцээний хаалтын үгийг хэлэх, бас дэлгэцийн зүүн талд зогсох эрхийг олж авсан байна.
90 минут үргэлжлэх мэтгэлцээнийг Филадельфи хотын National Constitution Center төвийн танхимд үзэгчгүйгээр зохион байгуулахаар болжээ.
Дүрмийг ABC News суваг танилцуулсны дараа Харрисын сонгуулийн штаб “өрсөлдөгчид нь давуу боломжтой формат”-аар явагдах болсон хэдий ч мэтгэлцээнд саад учруулахгүйн тулд нөхцөлийг зөвшөөрснөө мэдэгдсэн байна.
Өнгөрсөн долоо хоногт энэ талаар Трамп хоёрдмол утгатай байр суурь илэрхийлэхдээ микрофоныг “нээлттэй байлгахаас татгалзахгүй” гэсэн ч бас “өмнөх мэтгэлцээний дүрмийг хэвээр хадгалахаар анхнаасаа тохиролцсон” гэж хэлж байжээ. Тэр бас зохион байгуулагч ABC News суваг нэр дэвшигчдэд ижил тэгш боломж олгоно гэдэгт эргэлзэж байгаагаа илэрхийлсэн нь мэтгэлцээн цуцлагдаж болзошгүй гэсэн яриа гарахад хүргэсэн юм.
Эх сурвалж: Aljazeera
