ОХУ-ын нийслэл Москва хот руу өчигдөр Украины тал нисгэгчгүй онгоцоор довтолсон ч ямар нэг хохирол амсаагүй тухай албаны эх сурвалж мэдээлжээ. Үүнийг дайн эхэлсэн цагаас хойш Москваг чиглэсэн томоохон ийм халдлагуудын нэг гэж дүгнэж байна.

“Энэ бол Москва хотод дроноор халдах гэсэн бүх цаг үеийн хамгийн том оролдлогуудын нэг байлаа” гэж тус хотын захирагч Сергей Собянин сошиал хуудсандаа мэдээлсэн байна.

Нийслэлийг тойрсон агаарын довтолгооноос хамгаалах системүүд бүх дроныг байндаа хүрэхээс нь өмнө устгасныг тэр бас мэдээлжээ.

Шөнийн тэнгэрт нисэж буй дроныг устгах үеэр дэлбэрэлт болж, зогсоолд байсан автомашинуудын дохиолол дуугарч буйг харуулсан дүрс бичлэгүүд сошиал сүлжээнд тарсан байна.

Лхагва гарагийн шөнө Оросын тал Украины 45 дроныг нутаг дэвсгэр дээрээ унагасны 11 нь Москваг чиглэж байсан гэнэ.

Украинтай хил залгаа Брянск мужийн захирагч Александр Богомаз мөн газар нутагт нь томоохон агаарын довтолгоо болох үеэр 23 дроныг унагасан тухай мэдээлжээ.

Өчигдөр буюу Лхагва гараг нь Украины арми Курск мужийн нутагт, Оросын арми Донбасын фронт дээр давшилтаа үргэлжлүүлсэн өдөр байлаа.

Украины арми сүүлийн хэдэн хоногийн дотор Курск мужийн Сейм гол дээр байрладаг гурван гүүрийг устгасан бол өчигдөр Оросын армийн хөвөгч гүүр болон үүнтэй холбоотой инженерийн техник төхөөрөмжүүдийг бас устгажээ.

Ингэхдээ АНУ-д үйлдвэрлэсэн HIMARS пуужингийн системийг ашигласан байна.

Киевийн эрх баригчид Курскийн ажиллагааны үеэр Өрнөдийн зэр зэвсгийг ашигласнаа анх удаа албан ёсоор мэдээлсэн нь энэ байлаа.

Наймдугаар сарын 6-ны өдөр Курскийн ажиллагаа эхэлснээс хойш Украины цэргийн довтолгооны улмаас 31 энгийн иргэн алагдаж, 143 хүн шархадсаны 79 нь эмнэлэгт эмчлүүлж байгаа тухай ТАСС агентлаг өчигдөр мэдээлжээ.

Эх сурвалж: Associated Press