Саяхан Беларусийн ерөнхийлөгч Александр Лукашенкогийн хэлсэн үг Арменийн ард иргэдийг хилэгнүүлсэн байна.
Өчигдөр хэсэг иргэд Ереван хот дахь Беларусийн элчин сайдын яамны байр руу өндөг, улаан лооль шидэж, тус улстай дипломат харилцаагаа таслахыг эрх баригчдаасаа шаарджээ.
Өмнөх өдөр нь Оросын төв телевизээр ярихдаа Лукашенко тус улсын одоогийн эрх баригчдын явуулж буй Москвагаас холдож, Өрнөдтэй ойртох гадаад бодлогыг хурцаар шүүмжилсэн юм.
“Арменичууд хэнд хэрэгтэй юм бэ? Хэнд ч биш. Эдийн засгаа хөгжүүлж, өөрийн нөөц боломжиндоо найдах гээд үзэг л дээ. Франц гэж юу юм? Макрон гэж хэн юм? Маргааш Макрон байхгүй болоход бүгд арменичуудыг мартана шүү дээ” гэж Лукашенко ярьжээ.
Беларусийн элчин сайдын яамны гадна болсон эсэргүүцлийн ажиллагааг Өрнөдийн талыг баримтлагч Бүгд Найрамдах Улсын Төлөө нам зохион байгуулсан юм.
Эсэргүүцлийн ажиллагаанд оролцогчдын дунд тус намын дарга Арман Бабажанян байсан байна.
Тэд Беларусийн элчин сайдыг нутаг дэвсгэрээсээ хөөх, Минсктэй дипломат харилцаагаа таслахыг уриалсан шаардах бичигт иргэдийн гарын үсгийг цуглуулж эхэлжээ.
Хөдөлгөөнд Арменийн өөр хоёр улс төрийн нам болон Өрнөдийн талыг баримтлагч төрийн бус байгууллагууд нэгдсэн байна.
2020 оны Уулын Карабахын дайнд Азербайжан улсыг бэлдэхэд Москвад төвтэй Хамтын Аюулгүй Байдлын Гэрээний Байгууллагын хоёр гишүүн улс тусалсан талаар Арменийн ерөнхий сайд Никол Пашинян энэ оны тавдугаар сард эгдүүцэн ярьж байв.
Тэр Орос, Беларусь хоёрыг хэлсэн нь тодорхой байсан юм.
Өнгөрсөн оны есдүгээр сард Азербайжан улс Уулын Карабахаас салан тусгаарлагч хүчийг шахан гаргаж, өөрийн газар нутагт нэгтгэсэн.
Сүүлийн 30 орчим жил Арменийн хяналтад байсан газар нутгийг алдсан энэ үйл явдлын дараа Ереван, Москвагийн харилцаа эрс муудаад байгаа.
Оросын тал Арменийн аюулгүй байдлыг хангах амлалтаа биелүүлээгүй гэсэн үндэслэлээр Ереваны эрх баригчид Өрнөдийн орнуудтай ойртох бодлогыг эрчимтэй хэрэгжүүлж эхэлсэн юм.
Пашинян улс орноо Хамтын Аюулгүй Байдлын Гэрээний Байгууллагаас гаргах санааг олон удаа цухуйлгаад байгаа.
ОХУ-ын гадаад хэргийн сайд Сергей Лавров түүнийг Өрнөдийн захиалгаар “Орос-Арменийн харилцааг сүйрүүлэхийг зорьж байна” хэмээн шүүмжилж байв.
Эх сурвалж: Radio Free Europe
