Японы ерөнхий сайд Фүмио Кишида эрх баригч намын даргын сонгуульд өрсөлдөхгүй гэдгээ мэдэгдсэний дараа түүний орыг хэн залгамжлах вэ гэдэг асуулт үүссэн. Түүний орыг залгамжлан ерөнхий сайд болох хүсэлтэй байгаагаа Японы засгийн газрын одоогийн болон хуучны хэд хэдэн албан тушаалтан мэдэгдсэн билээ. Горилогсдын хэн нь ерөнхий сайд болох өндөр магадлалтайг урьдчилсан байдлаар тодруулахаар Киодо агентлаг Бямба гаригаас хойш гурван өдрийн турш улс даяар санал асуулга явуулжээ.

Санал асуулгын дүнг Батлан хамгаалахын сайд асан Шигэрү Ишиба 25.3 хувиар тэргүүлжээ. Иргэд түүнийг Кишидаг залгамжлахад хамгийн тохиромжтой хүн гэж үзэж байна.

Түүний араас Байгаль орчны сайд асан Шинжиро Коизүми 19.6 хувиар, Эдийн засгийн аюулгүй байдлын сайд Санаэ Такаичи 10.1 хувиар удаалав. Харин Либерал ардчилсан намын дэмжигчдийн дунд явуулсан санал асуулгыг Шинжиро Коизүми 24.2 хувиар тэргүүлж, Ишиба 21 хувийн саналаар хоёрдугаарт оржээ. Японыг хэдэн арван жил тасралтгүй удирдсан Либерал ардчилсан нам 500 сая иен буюу 3.4 сая ам.долларын авлигын хэрэгт өнгөрсөн онд холбогдсон. Энэ хэргийн хариуцлагыг хүлээхийн тулд сонгуульд нэр дэвшихгүй гэдгээ Кишида зарласан билээ.

Тэгвэл Кишида ерөнхий сайдын албан тушаалаа хүлээлгэж өгсөн ч эрх баригч намд итгэх итгэл сэргэхгүй гэж судалгаанд оролцогчдын 78 хувь нь хариулсан байна. Мөн санал асуулгад оролцогчдын 66.8 хувь нь Кишидаг намын дарга болон ерөнхий сайдын албан тушаалаасаа огцрох нь зүйтэй гэж үзжээ. Ердөө 25.4 хувь нь Кишидаг огцрох шийдвэр гаргах ёсгүй гэж үзэж байна.

67 настай Шигэрү Ишибагийн хувьд нам дотроо тийм ч өндөр нэр хүндтэй биш гэдэг. Өнөөг хүртэл тэр Либерал ардчилсан намыг удирдахаар дөрвөн ч удаа оролджээ. Өдгөө 43 настай Шинжиро Коизүми нь 2001-2006 онд Япон улсыг харьцангуй өндөр үнэлгээтэй удирдаж байсан ерөнхий сайд асан Жүнитиро Коизүмигийн хүү юм. Харин санал асуулгын гуравдугаар байранд орсон Санаэ Такаичи нь эмэгтэй улстөрч бөгөөд хатуу үзэл баримтлалтай гэдгээрээ алдартай.

Эх сурвалж: JAPAN TODAY