Канадын Засгийн газар худалдааны талбарт Америк, Европтой нэгдмэл бодлого баримтлах арга замыг эрэлхийлж байна.

Энэ хүрээнд Канад улс Хятадад үйлдвэрлэсэн цахилгаан автомашины импортыг хязгаарлах бодлого барьж байна.

Канадын Сангийн сайд Хятадын цахилгаан автомашины импортыг хязгаарлах асуудлаар олон нийтийн дунд долоодугаар сарын 2-ноос эхлээд 30 хоногийн хугацаанд хэлэлцүүлэг явуулахаар зарлалаа.

Энэ бол Хятадын цахилгаан автомашины татварыг огцом нэмэгдүүлэх хөрсийг бэлтгэж байгаа эхний алхам гэж үзэж болно.

Канадын автомашины салбар Хятадын төрөөс зориудаар, хэт их татаасаар дэмжих бодлогоос үүдэлтэй шударга бус өрсөлдөөнтэй тулгарч байна гэж Канадын Сангийн яам мэдэгдсэн.

Харин Бээжин өөрийн хэт давуу хүчин чадлаар далайлган цахилгаан автомашины зах зээлд шударга бус өрсөлдөөн бий болголоо гэсэн Олон улсын шүүмжлэлийг няцааж байгаа юм.

Канадын Засгийн газар Хятадын цахилгаан тээврийн хэрэгсэлд тогтоосон татварын хэмжээг нэмэгдүүлэхдээ Америк болон Европын холбоотой нэгдмэл бодлого барих эсэх дээр иргэдийнхээ санаа бодлыг тусгахаар зорьж байна.

Канадын эрх баригчид ажлын байраа хамгаалахын тулд импортын татвар нэмэгдүүлэх нь зүйтэй гэсэн дотоодын автомашин үйлдвэрлэгчдийнхээ шахалттай тулгарч байгаа.

Канадын хамгийн их хүн амтай муж, автомашины үндсэн үйлдвэрлэлийн төв болох Онтариогийн ерөнхий сайд Оттаваг Хятадад үйлдвэрлэсэн цахилгаан автомашинд дор хаяж 100 хувийн татвар ногдуулахыг уриалсан байна.

Одоогоор Канад улс Хятадын цахилгаан автомашинаас 6 орчим хувийн импортын татвар авдаг. Хятадын хувьд одоогоор цахилгаан автомашины салбарт тэргүүлж байна.

2021 онд дэлхий даяар цахилгаан автомашины лити-ион батарейны бараг 80 хувь нь Хятадын зах зээлээс гарсан, Олон улсын эрчим хүчний агентлагийн мэдээлснээр 2023 оны байдлаар дэлхийн цахилгаан автомашины борлуулалтын 60 орчим хувь нь Хятадад үйлдвэрлэсэн байна.