Энэтхэгийн Ерөнхий сайд Нарендра Моди ирэх жил /2025 онд/ 75 нас хүрнэ. Гэвч энэ нь түүнийг Ерөнхий сайдын албан албан тушаалаас буулгах шалтгаан болохгүй гэдгийг Энэтхэгийн Дотоод хэргийн сайд Амит Шах өмнөд нутгийн Хайдарабад хотод болсон хэвлэлийн хурлын үеэр мэдэгджээ. “Модиг өөр хүнээр солих шаардлага бидэнд байхгүй” гэж сайд хэлжээ.

Амит Шах энэ мэдэгдлийг сөрөг хүчний “Жирийн хүний нам”-ын дарга Арвинд Кежривалын хэлсэн үгийн хариуд хийсэн байна. Кежривал “Энэтхэгийн Ардын намын /Бхаратия жаната парти/ удирдагчид 75 нас хүрснийхээ дараа огцорч байх ёстой гэсэн дүрмийг Ерөнхий сайд Моди 2014 онд өөрөө зохиосон, тэрбээр ирэх оны 9 дүгээр сарын 17-нд 75 нас хүрнэ” гэж Кежривал сануулсан байна. Үүний хариуд Дотоод хэргийн сайд “Бхаратия жаната парти” намын дүрмэнд насны хязгаарлалтын талаар тусгаагүй” гэжээ.

Ташрамд дурдахад, Энэтхэг улсад 4 дүгээр сарын 19-нээс эхлэн парламентын сонгууль явагдаж байгаа бөгөөд хэд хэдэн үе шаттайгаар 6 дугаар сарын эхэн хүртэл үргэлжлэх юм. Энэ сонгуульд Модигийн удирдсан Энэтхэгийн Ардын нам ялах магадлалтай байгаа ба тус намтай сөрөг хүчний I.N.D.I.A. (Indian National Developmental Inclusive Alliance) эвсэл ширүүн өрсөлдөж байна. Эвсэлд 28 нам нэгдсэн бөгөөд эвслийн гол хүч нь Энэтхэгийн үндэсний конгресс нам юм.