Даваа гаригт ОХУ-ын батлан хамгаалах яам тактикийн цөмийн зэвсгийн байлдааны сургуулилалтад бэлдэж эхэлснийг зарлажээ. “ОХУ-ын зэвсэгт хүчний дээд ерөнхий командлагчийн тушаалаар стратегийн бус цөмийн зэвсэгт хүчний байлдааны үүрэг гүйцэтгэх бэлэн байдлыг нэмэгдүүлэх зорилготой дадлага сургуулилалтыг жанжин штаб ойрын үед зохион байгуулахаар бэлдэж эхэллээ” гэж уг мэдэгдэлд дурьдсан байна.

Сургуулилтад Доны Ростов хотод төвлөрдөг Оросын зэвсэгт хүчний өмнөд цэргийн тойргийн пуужин, агаарын болон тэнгисийн хүчний анги нэгтгэлүүд оролцох юм байна. Өрнөдийн зарим албан тушаалтнуудын ОХУ-ын эсрэг өдөөн хатгасан мэдэгдлийн хариуд ийм сургуулилалт зохион байгуулах болсноо мөн тайлбарлажээ.

Энэхүү сургуулилалт нь Өрнөдийн зарим удирдагчдын Украинд цэрэг илгээх тухай мэдэгдэлтэй холбоотойг Кремлийн хэвлэлийн төлөөлөгч Дмитрий Песков баталжээ. Тухайлбал, өнгөрөгч пүрэв гаригт Францын ерөнхийлөгч Эммануэл Макроны ярилцлага “The Economist” сэтгүүлд нийтлэгдсэн. Макрон энэ ярилцлагадаа "Хэрвээ Оросын цэрэг фронтын шугамыг цөмлөж, Киевийн эрх баригчид хүсэлт гаргасан тохиолдолд Франц улс Украинд цэргийн хүч илгээх хууль ёсны нөхцөл бүрдэнэ" гэсэн юм.

Эх сурвалж: AFP