Уэльсийн гүнж Кэтрин хорт хавдараар өвчилж, курс химийн эмчилгээ хийлгэж байгаа тухайгаа мэдээллээ.

Тэрээр "Нэгдүгээр сард би хэвлийн хөндийн ноцтой мэс засалд орсон. Тэр үеэр надад хорт хавдар байхгүй гэсэн юм. Мэс засал амжилттай хийгдсэн. Харин түүний дараах шинжилгээ нь надад хорт хавдар байгааг харуулсан. Миний эмчилгээний баг урьдчилан сэргийлсэн химийн эмчилгээнд орохыг зөвлөсний дагуу би одоо энэ эмчилгээний эхний шатанд байгаа" хэмээн Британийн хаан ширээ залгамжлагч ханхүү Уильямын эхнэр хэлээд өөрт нь болон түүний гэр бүлд маш том цочрол боллоо гэжээ.

Мөн тэрээр "Би бүрэн эдгэрнэ гэж өөрийгөө дайчилж байна, биеийн байдал сайн байгаа" хэмээн хэлжээ.

Гүнж британичуудад дэмжлэг болон эдгэрэхийг хүссэнд нь талархаад, эмчилгээг амжилттай гүйцээхэд түүний дотны хүмүүст “цаг хугацаа ба хувийн орон зай хэрэгтэй” гэж онцолжээ.

Энэ бүгдийн дараа тэр албан ёсны үүрэгтээ эргэн орохоор тооцоолж байгаа хэмээн хэлсэн байна.

Гүнж Кейт мөн, мэс заслын дараа илүү их цагийг хүүхдүүддээ юу болж буйг тайлбарлаж, “бүх зүйл сайн болно” гэж ойлгуулахад зарцуулсан, өөрийн нөхрийн дэмжлэгийг өндөр үнэлэн цэгнэж байгаа гэжээ. Хосууд 10 настай ханхүү Жорж, 8 настай гүнж Шарлотта, 5 настай ханхүү Луи гэдэг гурван хүүхэдтэй.

"Одоо би амьдралыг нь хорт хавдар өөрчилсөн бүгдийн тухай бодож байна. Энэ өвчний бүхий л хэлбэртэй тэмцэж буй бүгдэд би найдлагаа хаяхгүй байхыг хүсье. Та бүгд ганцаараа биш” хэмээн хэлэв.

Британийн ерөнхий сайд Риши Сунак мэдэгдэхдээ, "Бүх иргэдийнхээ өмнөөс гүнжид хурдан эдгэрэхийг хүсэж байна" гэв. Мөн Британичуудад хандан өөрийн өвчний талаар мэдээлсэн гүнж “гайхамшигтай эр зоригийг гаргалаа” гэж үнэлжээ.

Олон орнуудын хэвлэл мэдээлэл, цахим сүлжээний хэрэглэгчид сүүлийн долоо хоногуудад “Гүнжид шударга бусаар хандсан" гэж Ерөнхий сайд хэлжээ.

М.ЦОГТ