Оросын сөрөг хүчний улстөрч Алексей Навальныйг маргааш буюу 2024 оны гуравдугаар сарын 1-ний өдөр Москва хотод оршуулахаар болсныг түүний хэвлэлийн төлөөлөгч мэдэгдлээ.

Түүнийг Москвагийн зүүн өмнөд Марьино дүүргийн сүмд үйлдсэний дараа Борисовын оршуулгын газарт нутаглуулахаар болсон байна.

Түүнд хүндэтгэл үзүүлсэн хэдэн зуун хүнийг Оросын цагдаа нар баривчилж байлаа. Харин одоогоор оршуулгын ёслол ямар нөхцөл байдалд болох нь тодорхойгүй байна.

Талийгаачийн хэвлэлийн төлөөлөгч Кира Ярмыш оршуулгын ёслол зохион байгуулах газар олоход хэцүү байгааг талаар "Сүмүүдийн зарим нь дүүрэн захиалгатай гэж хариулж байна. Зарим нь Навальный гэсэн нэрийг сонсмогцоо татгалзаж байна. Бүр нэг газар бидэнтэй хамтарч ажиллаж болохгүй гэсэн чиглэл дээрээс авснаа хэлсэн” гэж мэдээлэв. 

Мөн талийгаачийн эхнэр Юлия нөхрийнх нь оршуулгын үеэр баривчилгаа явагдаж болзошгүйд санаа зовж байгаагаа илэрхийлжээ.

Тэрээ "Оршуулгын ёслол тайван болж өнгөрөх, эсвэл нөхөртэй маань салах ёс гүйцэтгэхээр ирсэн хүмүүсийг цагдаа нар баривчлах эсэхийг одоогоор хэлж мэдэхгүй байна. Путин бол зохион байгуулалттай гэмт хэргийн бүлэглэлийн толгойлогч. Та бүхэн улс төрчтэй биш, цуст алуурчинтай харьцаж байна” гэжээ. 

Дашрамд, ОХУ-ын ерөнхийлөгч Путин хууль тогтоох дээд байгууллагадаа жил тутмын илтгэл тавьсны маргааш Навальныйг оршуулах ёслол болох гэж байна.